Ажәабжьқәа

Популярное

Леон Кәарҷиа: ахәаахәҭратә цәаҳәақәа ашьаҟамҩақәа рҟынтәи аџьармыкьа ахыбра аҵаҟа ииагатәуп

321
02.03.2017 14:52
Леон Кәарҷиа: ахәаахәҭратә цәаҳәақәа ашьаҟамҩақәа рҟынтәи аџьармыкьа ахыбра аҵаҟа ииагатәуп
Аҳҭнықалақь Ахадареи, атәыла аҩныҵҟатәи аусқәа Рминистрреи, асанитартә-епидимиологиатә Станциеи Аҟәа ақалақьтә Еизареи рхаҭарнакцәа злахәыз акомиссиа Аҟәатәи аџьармыкьа Хада агәаҭара мҩаҧыргеит.

Аҟәа. Хәажәкыра 2. Аҧсныпресс. Дырмит Басариа. Аинспекциа амҩаҧгаразы ажәалагала ҟанаҵеит Аҟәа ақалақьтә Еизара адепутатцәа. Уи, иара убас, аҳҭнықалақь Ахадареи, атәыла аҩныҵҟатәи аусқәа Рминистрреи, асанитартә-епидимиологиатә Станциеи рхаҭарнакцәа алахәын.

Аҟәа ақалақьтә Еизара адепутат Дмитри Гәынба иажәақәа рыла, иарбоу аусмҩаҧгатә аџьармыкьа иазааигәоу атерриториаҿы лассы иҧхасҭахо афатә аалыҵқәа рыҭира аҧҟарақәа реилагара иадҳәалоу афактқәа маҷымкәа рыҟазаара ауп мзызс иамоу. “Ҳара хықәкыс иҳамоуп, акомиссиа алахәылацәа ҳацырхырааны аџьармыкьаҿы ишьақәгылаз аҭагылазаашьа аилкаара, насгьы иҟоу апроблемақәа рыӡбаразы амҩақәа рыҧшаара. Аџьармыкьа аҩбатәи аихагылаҿы имаҷымкәа аҭыҧқәа ҭацәны иаанханы иҟоуп. Қьырала иаанкылоу, аха иҭацәны иаанханы иҟоу ҭыҧқәак егьырҭ ахәаахәҭыҩцәа рыҭара азҵаара ӡбатәуп. Иара убас, адәахьы аус зуа ахәаахәҭыҩцәа ахәаахәҭратә ҭыҧқәа ашьҭаҵарҭа ҳасабала рхы иархәо, атауар ашьаҟамҩаҿы иқәыргыланы иахьырҭиуа, аҧҟарақәа реилагара ахь иаҵанакуеит”, – ҳәа иҳәеит иара.
CentralniyRynok_4_Sukhum_Abkhazia_030317.jpg
Аҟәа ақалақь асанитартә хақьым хада Алла Белиаева аҭагылазаашьа лхатәы ахәшьара алҭеит: “Ашьаҟамҩаҿы ахәаахәҭра амҩаҧгаразы азин ыҟаӡам. Убри аан, ақыҭанхацәа лассы иҧхасҭахо атауарқәа адәахьы иқәгыланы ирҭиуеит. Ахәаахәҭра уи азы ҷыдала иазалху аҭыҧ ахь ииагатәуп.

Уи дақәшаҳаҭхеит Аҟәа ақалақь ахада ихаҭыҧуаҩ Леон Кәарҷиагьы: “Апроблема ӡбашьас иамоу зегьы рзы еилкаауп – ашьаҟамҩаҿы ишьақәыргылоу ахәаахәҭратә цәаҳәақәа зегьы аџьармыкьа аҩныҵҟа ииагатәуп. Уи азы аҭакҧхықәра зду аусбарҭақәа зегьы рхаҭарнакцәа ари агәаанагара иақәшаҳаҭхеит.

Ахәҭакахьала, Аҟәатәи аџьармыкьа Хада аиҳабы Алхас Гәыргәылиа инаҵшьны иазгәеиҭеит: “ҳара уи ҳаҿагылаӡом, уи моу, акырынтә афатә аалыҵ ахьырҭиуа ахәаахәҭратә цәаҳәақәа ашьаҟамҩақәа рҟынтәи аџьармыкьа ахыбра аҿы аиагара ҳҽазаҳшәахьеит. Уадаҩрас иҟалаз – ахәаахәҭыҩцәа уи иақәшаҳаҭым. Урҭ рхыҧхьаӡараҿы иҟоуп зықәрахь инеихьоу ауаа, згәабзеиратә лшарақәа ҧку ахәаахәҭыҩцәа. Урҭ рҕьырак аҩбатәи аихагыла ахь ахалара рцәыуадаҩуп”.

Алхас Гәыргәалиа ихаҭыҧуаҩ Роман Џьуҕьелиа иажәақәа рыла ахәаахәҭыҩцәа рақәыршаҳаҭхаразы, ирзыманшәалоу аҭагылазаашьа аҧҵатәуп. “Уажәазы ақыҭанхамҩатә џьармыкьа аҩбатәи аихагылаҿы иҟоуп, амаҭәақәа рыҭира аҟәша ҵаҟа иҟоуп. Урҭ ҭыҧла иҧсахзар, апроблема аӡбара алыршахон ҳәа агәаанагара сымоуп. Аха убри аан аҭыҧқәа рҿы аиҭашьақәыргыларатә усурақәа рымҩаҧгареи иахәҭоу аиқәаршәареи хымҧадатәны иҟоуп”, – ҳәа азгәеиҭеит иара.

CentralniyRynok_3_Sukhum_Abkhazia_030317.jpg
 Акомиссиа алахәылацәа ашьаҟамҩаҿы лассы иҧхасҭахо атауарқәа рыла ихәаахәҭуа аусдкылаҩцәа гәыҧҩык “аџьармыкьа аҩныҵҟа аҭыҧ шәзоужьхар, шәара аусура шәазыразу шәазыразыму? ”ҳәа азҵаарақәа рыҭан. Аӡәырҩы ахәаахәҭыҩцәа “уи ҳазыхиоуп иахәҭоу аҭагылазаашьа ҳзаҧҵахар” ҳәа аҭак ҟарҵеит.

Иаагозар, хаҭалатәи аусдкылаҩ, аџьармыкьа иаду атерриториҿы лхала иаалрыхуа ахшхарҵәи акәаци зҭиуа Лариса Калаиџьан илҳәеит: “сара уаанӡа аџьармыкьа аҩныҵҟа аус зуан, азарал соуит, избан акәзар, адәахьы аус зуа ахәаахәҭыҩцәа узрыцлабӡом, урҭ аахәаҩцәа еиҳа ирыдҵаалоит. Аџьармыкьа иатәу ахәаахәҭратә цәаҳәақәа рҿы архьшәашәагақәа рзы аҭыҧқәа азҧхьагәаҭаӡам, аҳауа зрыцқьо асистема ыҟаӡам. Акәаци ахшхарҵәи рыҭиразы ахәаахәҭратә цәаҳәақәа зегьы иманшәалоу аҭагылазаашьа ахьыҟоу аҭыҧқәа рахь ииаргар, сара уахь аиасра хымҧада сазхиоуп”.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа