Ажәабжьқәа

Популярное

Кан Кәарҷиа: аџьармыкьа – ақалақь азы акырӡа зҵазкуа аусхкқәа еимаздо акакәны иҟоуп, араҟа шьаҿа-шьаҿала аҭагылазаашьа арҽеира ахәҭоуп

299
06.11.2019 16:18
Кан Кәарҷиа: аџьармыкьа – ақалақь азы акырӡа зҵазкуа аусхкқәа еимаздо акакәны иҟоуп, араҟа шьаҿа-шьаҿала аҭагылазаашьа арҽеира ахәҭоуп
Аҟәа ақалақь ахада инапынҵақәа назыгӡо Кан Кәарҷиа аҳҭнықалақь аҿы агәаҭарақәа рымҩаҧгара иациҵеит.

Аҟәа. Абҵарамза 6. Аҧсныпрес. Дамеи Касланӡиа. Аҟәа ақалақь ахада инапынҵақәа назыгӡо Кан Кәарҷиа аҳҭнықалақь аџьармыкьа хада иаҧну атерриториа аҿы иҟоу аҭагылазаашьа гәеиҭеит.

Кан Кәарҷиа агәаҭаратә усмҩаҧгатә аҩнусбарҭа №3 аҿы аилатәара ала далагеит.  Аҩнусбарҭа аиҳабы Асҭамыр Матуа иҟоу апроблемақәа рзы адырра ҟаиҵеит: “Џьонуа имҩадууи Аиааира апроспекти рҭеиҭыҧш арҽеира азы ацхыраара ҳҭахуп. Уаҟа ашьапылатә аиасырҭа иқәу акаҭран аҭагылазаашьа даара ицәгьоуп, уи атранспорт аныҟәара акыр иаруадаҩуп, убри аҩыза аҭагылазаашьа шьақәгылеит Имам Шамиль имҩадууи Аиаира апроспекти реихысырҭаҿы. Аџьармыкьа аҟынтәи авокзал ахь инагоу ахыкәшарҭатә амҩаду аҿы акаҭран бжьысхьеит. Уи иахҟьаны лассы-лассы амашьынақәа реиҧынгылара ҟалоит. Иҟоуп амашәыр зхылҿиаар зылшо иуашәшәыроу ахыбрақәагьы, иаагозар, аҩны №44, уаҟа аҧшасра ҕәҕәа иахҟьаны ахыбра хнакит. Аамҭа кьаҿ иалагӡаны Чачба имҩа ала игылоу аҩны №88 апроблема ӡбатәуп. Ари аҩны  зусура еиҧҟьоу аӡымҩангага иахҟьаны маҷк аӡы аҵалоит. Убри аҩыза апроблема ыҟоуп Чачба имҩадууи Лакоба имҩадууи реихысырҭа аҿы игылоу аҩнқәеи, Адлеиба имҩаҿы игылоу аҩны №42. Аӡыҭгара азы иҟоу аӡхагалагақәа лассы-лассы иҧхасҭахоит усҟан аҩнқәа рыгәраҵақәа аӡы рыҵалоит”.

Ахәҭакахьала, Амуниципалтә Усбарҭа “Аҟәа ақалақь Ахадара акоммуналтә Усбарҭа” анапхгаҩы Дмитри Аҳәба аӡы аҵалара иадҳәалоу апроблема егьырҭ аҭыҧқәа жәпакы рҿы иҟоуп ҳәа иазгәеиҭеит. “Аҩардан имҩаду аҟынтәи Агәмаа имҩа аҟынӡа иҿыцу арҩаршьҭра ҟаҵатәуп”, – ҳәа иҳәеит иара.

Арлашара аҟамзаара иадҳәалоу даҽа проблемак азгәаҭан: ашьаҟақәа ыҟоуп, аха алампионқәа азхом.

Кан Кәарҷиа Џьонуа имҩаду аҿы игылоу аҩнеихагыла №44 ахыбра аиҭашьақәыргылара азы ахарџь азоужьуп ҳәа адырра ҟаиҵеит. Ақалақь ахада инапынҵақәа назыгӡо амҩақәа рырҽеира, Имам Шамиль имҩадууи Аиааира апроспкти реихысырҭаҿы игылоу асветофор аиҭашьақәыргылара, иара убас аҩнқәа рыгәраҵақәа аӡы аҵалара иадҳәалоу апроблемақәа рыӡбара азы адҵақәа риҭеит.



Аилацәажәара ашьҭахь, Кан Кәарҷиа аџьармыкьа хада азааигәара иҟоу атерриториа гәеиҭеит: “Ҭыҧқәак рҿы, аҩнеихагылақәа раҧхьа аҳәира зхыиааз адгьылқәа рацәаны иҟоуп. Ари ҳақалақь аестетикатә цәаҩа акыр иаҧырхагоуп. Ҧыхьатәи ауҭрақәа раандақәа зегьы ықәгатәуп, атерриториа рыцқьатәуп, адгьыл здызкылаз зегьы иахәҭоу ала рхы мҩаҧыргароуп. Ацхыраара аҭаххозар, уи аҟаҵара ҳазхиоуп”. Убри аан, аҳҭнықалақь ахада инапынҵақәа назыгӡо Иҷдоу автонхамҩа арыцқьарақәа раан ацхыраара рыҭаразы адҵа ҟаиҵеит.



Аџьармыкьа Хада аплошьад аҿы Кан Кәарҷиа амашьынақәа реиҧынгылара еиҳа ишмаҷхаз азгәеиҭеит. “Уажәы амашьынақәа рыргылара амҩаду азганк аҿы мацара иҟалоит, уи иабзоураны амашьынала амҩасра еиҳа иманшәалахеит. Хра злоу аиҭакрақәа шыҟоу умбар залшом, аха уи аринахысгьы анагӡара алыршатәуп. Ауаа ашьыжьымҭан иааны ртауар анақәырх ашьҭахь, амашьынақәа араантәи ицароуп. Аинвалидцәа рзы амашьынақәа рыргыларҭа ахьыҟоу ииашоуп ҳәа исыҧхьаӡоит”, – ҳәа иҳәеит иара. Аҳҭнықалақь инапынҵақәа назыгӡо автобусқәа раангыларҭақәа рҭеиҭыҧш арҽеиреи, хаҳәатәала адәқьанқәеи егьырҭ ахыбрақәеи рганқәа рҿы ишьақәыргылоу аӡыргаратә ҕәқәа рықәгареи рзы адҵа риҭеит.



Убри аан, Аҳәынҭқарратә автоинспекциа ахаҭарнакцәа адырра ҟарҵеит: “Ақалақь аџьармыкьа Хада аҿы абар шьҭа фымш ирылагӡаны аусурақәа мҩаҧысуеит. Ихымҧадатәны иахьыҟоу аҭыҧқәа рҿы амҩатә дыргақәа шьақәыргылахоит, иаагозар,Аҩардан имҩаду арыҕьаратә ган аҿы”.

Кан Кәарҷиа ашьаҟамҩақәа рҿы ишьақәгылоу ахәаахәҭратә ҭыҧқәа ахшыҩзышьҭра аиҭеит: “Ахәҳаахәҭыҩцәа баша рықәцара ииашахарым ҳәа сгәы иаанагоит. Урҭ рыстатус алканы иҟоу аҭагылазаашьа ӡбашьак аҭатәуп. Џьоукы рыдәқьанқәа рҿы аҭыҧ рзымхазт, ашьаҟамҩахь ицәырҵит, уимоу аргыларақәагьы ирылагеит. Ари ҳара ҳкультура аҩаӡара аанарҧшуеит! Аиҳарак зхароу ҳара ҳауп. Аџьармыкьа – ақалақь азы акырӡа зҵазкуа аусхкқәа еимаздо акакәны иҟоуп, араҟа шьаҿа-шьаҿала аҭагылазаашьа арҽеира ахәҭоуп. Сгәы иаанагоит уи ауаа еилыркаауазароуп ҳәа”.

Убасҵәҟьа, Кан Кәарҷиа ахәаахәҭра амҩаҧгара аҧҟарақәа дырзааҭгылеит: “Адәқьанқәа зыргыло ауаа ирхамышҭуазароуп урҭ аргыларазы азин шрырҭаз, убри аан амашьынақәа рыргыларҭақәа рзы азин шрымам. Атроллеибусқәеи автобусқәеи рзы ацәаҳәа азоужьзар, уи иаанагом араҟа амшьынақәа раангыларҭа еиҿкаатәуп ҳәа. Аилыркааратә усура мҩаҧгатәуп. Иаагозар, атауар аагареи агареи рзы аамҭа алухыр алшоит. Ауаа абизнес ала зхы ныҟәызго урҧырхагамхароуп”.

Амҩақәа рҭагылазаашьа агәаҭараан, атролеибус аныҟәцаҩ  Кан Кәарҷиа иахь ихы рханы иҟоу апроблемақәа ртәы иҳәеит: “Сара атролеибус аныҟәцаҩыс аус зуеижьҭеи  абар шьҭа 40-шықәса ҵуеит. Уаанӡа ҳаанҿасырҭа Имам Шамиль имҩаду аҿы иҟан, уажәы уаҟа аанкылара азы азин ыҟаӡам, изабан акәзар иарбоу аҭыҧ автобусқәа раанкыларазы иазалырхит. Убри иахҟьаны, ҳара амҩа аихысырҭаҿы, Арӡынба имҩаҿы ҳаанымкылар ада ҧсыхәа ҳамам, лассы-лассы амашьынақәа рымҩасра ҳаҧырхагахоит. Иара убас, атролеибус амаршрут ҧсахны Алашарбага аҳаблахь ацара азы атролеибус уҭыҵны напыла аштанга уҧсахроуп, амш аныцәгьоу умбааӡакәа уи узыҟаҵараны иҟам. Аҽырбаразы аҭагылазаашьагьы ахьыҟам инамаданы, ус ҳусура иацаҳҵоит, ибааӡаз ҳамаҭәақәагьы ҳадбалоит. Уи, аиашазы, акыр иманшәалаӡам”. Кан Кәарҷиа атролеибус аныҟәцаҩ арҭ апроблемақәа ртәы шидыруа, насгьы урҭ рыӡбарагьы шалиршо азы агәра ииргеит.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа