Ажәабжьқәа

Популярное

Иури Воронов дыҟамыижьҭеи ҩажәи ҩба шықәса ҵит

83
11.09.2017 12:37
Иури Воронов дыҟамыижьҭеи ҩажәи ҩба шықәса ҵит
Аҧсны иналукааша аполитикатә усзуҩ, еицырдыруа археолог, аҭоурыхтә наукақәа рдоктор Иури Николаи-иҧа Воронов дыршьиижьҭеи 22 шықәса ҵит.

Аҟәа. Цәыббрамза 11. Аҧсныпресс. Иури Воронов цәыббрамза 11, 1995 шықәса рзы Аҟәа ақалақь аҿы инхарҭа аҿы гәымбылџьбарыла дшьын. Ари алахьеиқәҵаратә мшы аҽны уи дигәалаиршәоит Аҳәынҭқарра Ахада иҿы иҟоу астратегиатә ҭҵарақәа Рцентр адиректор Олег Дамениа. 
 
Уи иажәақәа рыла, Иури Воронов ҭауади-аамсҭеи рышьҭра иреиуаз, Аҧсны аҭоурых аҿы машәыршақә ицәырымҵыз уаҩын. Иури Воронов Аҧсны, Урыстәыла еиҧшҵәҟьа  шьахәлаҵәҟьа идыруан, уи Аҧсни Урыстәылеи ибзиаӡаны ирдыруаз, зажәа акыр алнадоз уаҩын. “Иури Николаи-иҧа аполитикатә арена аҿы ицәырҵрагьы машәыршақә иҟамлаӡеит, избан акәзар, усҟан аполитика ауаажәларра рыҧсҭазаара аҿы аҧыжәара аиуо иалагахьан, ауаа ракәзар, изышьцылахьаз, рнапы злакыз аусқәа ааныжьны аполитика рҽаларгалар акәхон. Уи хаҭала, субиективла имҩаҧгаз амҩа ҿыц алхра акәӡамызт, уи дарбанызаалак изы императив ҳасабла иаақәгылон. Иаргьы насҭха, наҧшыҩҵас аангылашьа имамызт, уи иарбоу апроцесс активла ихы алирхәырц акәхеит”, – ҳәа игәаанагара иҳәеит Олег Дамениа. 

Олег Дамениа игәаанагарала, аналитикк, зҵарадырра аҩаӡара даараӡа иҳаракыз уаҩык  иаҳасабала, Иури Воронов аамҭа кьаҿ иалагӡаны ауаажәларра рыҩныҵҟа имҩаҧысуа ииашаны аилкаара илшеит. Уи 80-тәи ашықәсқәа рынҵәамҭеи 90-тәи ашықәсқәа рылагамҭеи рзы еицырдыруа политикны аҟалареи, Аҧсны ашьақәгылашьа аҿы ихадоу ароль анагӡареи илшеит. “Усҟан ҳара ахақәиҭреи ахьыҧшымреи рзы ҳақәҧон, уи аамҭазы ахыхьчара акәын аус злаз. Ҳмилаҭтә қәҧара Урыстәыла аинтересқәа иахьрықәшәозгьы  жәаҳәарада акырӡа аанагон. Аха уи зегьы ишырзеилымкаауазгьы убас иҟалеит, ҳара ҳхы адагьы Урыстәыла аинтересқәагьы ҳахьчон. Ҳара Аҧсны иахьаҵанакуаз Урыстәыла аинтересқәа ҳахьчон. Абраҟагьы Иури Воронов иусура  ароль хада нанагӡеит. Уи, Аҧсны иахьаҵанакуаз ицоз иарбоу ақәҧара Урыстәыла азы иаиурыц зылшо аполитикатә ахҭыҧҟьақәа ҳасаб рзуны, аган аҿы дзаанымкылеит”, – ҳәа иҳәеит Олег Дамениа.
 
“Иури Воронов ишьра – аҵыхәтәантәи аамҭазы ҳара ҳполитикатә ҭоурых аҿы инагӡаны иҭҵаам, гәымбылџьбаратә хҭыс аазырҧшуа даҟьаны иаанхоит”, – ҳәа агәаанагара имоуп Олег Дамениа.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа