Ажәабжьқәа

Популярное

Гәугәуца Џьыкырба аҧсадгьыл ахьчаҩцәа ирызкны илыҩыз ашәҟәы “Афырхацәа – Аиааира ҳзаазгаз” аӡыргара мҩаҧысит

271
04.11.2019 20:34
Гәугәуца Џьыкырба аҧсадгьыл ахьчаҩцәа ирызкны илыҩыз ашәҟәы “Афырхацәа – Аиааира ҳзаазгаз” аӡыргара мҩаҧысит
Ашәҟәы 52-ҩык Аҧсны Аџьынџьтәылатәи еибашьра аҿы иҭахаз аҧсадгьыл ахьчаҩцәа ирызкуп.

Аҟәа. Абҵарамза 4. Аҧсныпресс. Дамеи Касланӡиа. Сергеи Дбар ихьӡ зху Аҧсны Аџьынџьтәылатәи еибашьра аҳәынҭқарратә музеи аҿы Гәугәуца Џьыкырба аҧсадгьыл ахьчаҩцәа ирызкны илыҩыз ашәҟәы “Афырхацәа – Аиааира ҳзаазгаз” аӡыргара мҩаҧысит. Аусмҩаҧгатә иаҭааит Аҳәыынҭқарра Ахада Рауль Ҳаџьымба, Аҳәынҭқарра Ахада ихаҭыҧуаҩ Аслан Барцыц, Гәдоуҭа араион ахада Руслан Ладариа, Аџьынџьтәылатәи еибашьра аҿы иҭахаз аҧсадгьыл ахьчаҩцәа рыуацәеи рҭахцәеи, аветеранцәа.

Ари ашәҟәы 52-ҩык Аҧсны Аџьынџьтәылатәи еибашьра аҿы иҭахаз аҧсадгьыл ахьчаҩцәа ирызкуп. Урҭ зегьы Гәдоуҭа ақалақь, Замостианка аҳабла иалҵыз роуп.

Жәандәрыҧшьтәи ашкол адиректор Џьума Габуниа аусмҩаҧгатә аартуа иазгәеиҭеит: “Ас еиҧш аҭыжьымҭа Аҧсны аҭоурых азы иналукааша хҭысуп, еиҵагыло абиҧарақәа рзы акырӡагьы аанагоит”.

Ашәҟәы автор, апублицист Гәугәуца Џьыкырба иарбоу аусмҩаҧгатә ашәҟәы аӡыргара мацара акәымкәа, иҭахаз афырхацәа ргәалашәара ишазку азгәалҭеит: “Иахьатәи амш аибашьраҟны иҭахаз ргәалашәара иазкуп. Аҭыжьымҭа иаҳәоит 1992-1993 шш. Аҧсны Аџьынџьтәылатә еибашьраан зыҧсадгьыл зхы ақәызҵаз, Гәдоуҭа ақалақь мрагыларатәи ахәҭа иалҵыз 52-ҩык аибашьцәа рыҧсҭазааратә мҩа атәы”, – ҳәа илҳәеит лара. Уи лажәақәа рыла ашәҟәы аҩра лыҵарҳәеит зыҷкәынцәа зцәыӡыз анацәа – Феруза Барцыц, Мераб Ақаҩба иан Светлана Шамба. Убас, Мераб Ақаҩба иан илҳәеит: “Сыҷкәын ифотосахьақәа ашәҟәы ианылар, издыруада, дырхамышҭыр”. Зыхшара зцәыӡыз анацәа рхьаа ахааназы ҳаргьы иаҳҳьааны иаанхоит”, – ҳәа инаҵшьны иазгәалҭеит Гәугәуца Џьыкырба.



Аҳәынҭкарра Ахада инаҵшьны иҳәеит Аҧсадгьыл ахьчаҩцәа рыхьӡ акамыршәра, урҭ рфырхаҵарақәа ртәы абиҧара ҿыцқәа рахь аиагара иамоу аҵак ду атәы.

“Ҳаҭыр зқәу ҳанацәа, ҳаҭыр зқәу ҳабацәа, ҳашьцәа, ҳаҳәшьцәа! Абри аҩыза ахҭыс, аибашьраан иҳацәҭахаз ҳаҷкәынцәа ҳаҳәшьцәа ирызку лаӷырӡыда иузымҩаҧгаӡо. Ихьанҭоуп арҭ азҵаарақәа рылацәажәара, аха сгәы иаанагоит, ҳаҷкәынцәеи ҳаҳәшьцәеи рыӡбахә зҳәо ари ашәҟәы гәаларшәага мацараны ишыҟамло. Ари ҳаҧхьаҟатәи ҳҧеиҧш, уаҳа ҳадгьыл аҟны еибашьра ҟамло, ҳаидгылара ҕәҕәахо, ҳажәлар раӡәкра ирсимволуп. Абарҭ ҳаҷкәынцәа, зыжәҩахыр еидҵаны еибашьуаз, ргәы еиҭамскәа аӷа ианижәлоз аиааира агаразы иҟарҵоз, ҳарҭгьы иаҳхамышҭыртә еиҧш аҭагылазаашьақәа аҧаҳҵалароуп. Хымҧада, иаҭахуп раҧхьаӡа инаргыланы ҳара ҳаидгылара, аибашьраан ҳазцәымӷыз аӷа ҳаниҿагылаз еиҧш. 

Иҭабуп ҳәа басҳәоит бара, хаҭала Гәугәуца, бџьабаа даараӡа ирацәоуп, ари ашәҟәы ус унатәаны иуҩыртә еиҧш иҟаӡамызт ҳәа сгәы иаанагоит. Бара иҟабҵаз, ҭаацәацыҧхьаӡа брылсны, аматериалқәа еизганы, абри аҩыза аҭыжьымҭа ҟалартә еиҧш аџьабаа ахьыббаз, хаҭала бҿаҧхьа схырхәоит. Схырхәоит шәара иахьа абра иҟоу шәҿаҧхьа, иҟам, адунеи зыҧсаххьоу ргәалашәара аҿаҧхьа. Иҟазааит наунагӡа ҳадгьыл аҟны аҭынч ҧсҭазаара, ҳхәыҷқәа аҧеиҧш бзиа роуааит, иҟазааит аиааира, еиҭах аиааира. Абзиарақәа шәымазааит, иҭабуп ҳәа шәасҳәоит зегьы!” – ҳәа иҳәеит Аҳәынҭқарра Ахада иқәгылараҟны.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа