Ажәабжьқәа

Популярное

Фазиль Искандер игәалашәара иазку ахәылҧаз иара ихьӡ зыхҵоу атеатр ахыбра аҵаҟа имҩаҧысит

319
07.03.2017 11:14
Фазиль Искандер игәалашәара иазку ахәылҧаз иара ихьӡ зыхҵоу атеатр ахыбра аҵаҟа имҩаҧысит
Аусмҩаҧгатә ихы алаирхәит Аҳәынҭқарра Ахада Рауль Ҳаџьымба.

Аҟәа. Хәажәкыра 7. Аҧсныпресс. Дырмит Басариа. Аҳәынҭқарратә аурыс драматә театр аҿы ашәҟәыҩҩы имш иира иадҳәаланы уи игәалашәара иазку ахәылҧаз мҩаҧысит. Аҳәынҭқарра Ахада Рауль Ҳаџьымба аусмҩаҧгатә ихы алаирхәит.

Уи аҧхьа, атәыла акультура аминистр Ельвира Арсалиаҧҳа лнапы зҵалҩыз ақәҵара инақәыршәаны, Аҳәынҭқарратә аурыс драмматә театр Фазиль Искандер ихьӡ ахҵахеит.

Ахәылҧаз аҳәаақәа ирҭагӡаны, ауаажәларратәи акультуреи русзуҩцәа ашәҟәыҩҩы изкны ргәалашәарақәа еиҭарҳәеит, Аҧснытәи адраматә театри аурыс драматә театри рартистцәа Фазиль Искандер ирҿиамҭақәа рцыҧҵәахақәа нарыгӡеит, иара убас, ашәҟәыҩҩы ирҿиамҭақәа рыла иҭыхыз акиносахьақәа рыфрагментқәа ахәаҧшцәа идырбахеит.

“Фазиль Аҧсны даҽа ганкахьала иааирҧшит, уи ифырхацәа ҳара иаҳҿырҧшуп, ҳара иҳацуп. Агәра ганы сыҟоуп, иага аамҭа царгьы, Фазиль Абдул-иҧа игәалашәара Аҧсны ишаанхо. Фазиль Искандер иҩымҭақәа рцәаҳәақәа рыла есымша ҳара дҳацуп”, – ҳәа иҳәеит Рауль Ҳаџьымба.

Фазиль Абдул-иҧа Искандер ихьӡ зху аҳәынҭқарратә аурыс драматә театр анаҧхгаҩы Иракли Хынҭәба иҳәеит: “атеатр аколлектив зегьы ахьӡала, Аҧсны Анаҧхгареи акультура Аминистрреи ауаажәларреи, Фазиль Искандер дуӡӡа ихьӡ аныҟәгара иҳауз аҳаҭыр азы ҭабуп ҳәа расҳәар сҭахыуп. Фазиль Абдул-иҧа иҟазара адунеи зегьы аҿы ахә ҳаракны иршьоит, убри аҟнытә ҳара ҳзы ари даара аҭакҧхықәра ду ацуп. Иҳауз ахьӡ ҳарак ишахәҭоу ала аныҟәгара ҳазхиоуп. Аамҭа кьаҿ иалагӡаны, ашәҟәыҩҩы иповестқәа рыла аспектакльқәа рықәыргылара азҧхьагәаҭаны иҳамоуп. Урҭ ахәаҧшыҩцәа 2018 шықәсазы идырбахоит”.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа