Ажәабжьқәа

Популярное

Ҭемыр Надараиа: Дмитри Дбар иааигаз аихшьаалақәа аҵабырг иацәыхароуп, урҭ ауаажәларра рырҩашьара иазырхоуп

788
05.12.2016 11:21
Ҭемыр Надараиа: Дмитри Дбар иааигаз аихшьаалақәа аҵабырг иацәыхароуп, урҭ ауаажәларра рырҩашьара иазырхоуп
Гал араион ахада инапынҵақәа назыгӡо Ҭемыр Надараиа Аҧсныпресс акорреспондент диҿцәажәо, Ареспубликатә уаажәларратә еиҿкаара “Кьараз” анаҧхгаҩы Дмитри Дбар, Егры аӡиас ала аҳәынҭкарратә ҳәаа ахысра иадҳәалны иҟаиҵаз астатистика арбагақәа дрыхцәажәеит.

Аҟәа. Ҧхынҷкәын 5. Аҧсныпресс. Гал араион ахада инапынҵақәа назыгӡо Ҭемыр Надараиа иазгәеиҭеит: Агәаҭаратә-аушьҭратә Ҧыҧшырҭақәа фба рҟынтәи офицалла иаркуп ҩба: акы–аҩадатәи азонаҿы, егьи– аладатәи азона иахьаҵанакуа. Иара убас, урыстәылатәи аҳәаахьчаҩцәа, уаанӡа изакәанымкәа аҳәаа ахысразы алшара ахьыҟаз, Егры аӡиас ала ицо арырҭақәа, еиҳа-еиҳа иадыркуеит. Уажәы уа иҟоу Агәаҭаратә-аушьҭратә Ҧыҧшырҭақәа рҿы иқәгылоу аруаа рхыҧхьаӡарагьы еизҳаит. Убасала, аҭагылазаашьа еиҳа еиҕьхеит ҳәа уҳәар алшоит. Уи еиҳарак изыбзоуроу урыстәылатәи аҳәаахьчаҩцәа роуп. Уимоу, ҳазҭоу 2016 шықәсазы, иаанханы иҟоу даҽа Агәаҭаратә-аушьҭратә Ҧыҧшырҭақәа ҩба раркразы зегьы хиоуп. Уи азы адырра роухьеит араион иаҵанакуа ақыҭақәа зегьы рхадацәа. Аладатәи азона аҟынтәи ауаа Аушьҭра-гәаҭаратә ҧыҧшырҭа аҟынӡа рнагаразы автобус аахәоуп, иара убас, уахь инеиуа амҩадугьы еиҭашьақәыргылоуп”.

Ҭемыр Надараиа инаҵшьны иазгәеиҭеит: “Дмитри Дбар иааигаз аихшьаалақәа аҵабырг иацәыхароуп. Урҭ ауаажәларра рырҩашьара иазырхоуп. Реалла иҟоу арбагақәа излаҳнарбо ала, мышкы ала Агәаҭара-аушьҭратә Ҧыҧшырҭақәа ҧшьба рыла, аҳәаа ганкахьы иахысуа ауаа рхыҧхьаӡара ааизакны 1400-1500-ҩык рҟынӡа инаӡоит. Иара убри аҟараҵәҟьа шьҭахьҟа игьежьуеит. Ицац ауаа роуп еиҳарак аҳәаа иахысуа. 95% – Гал араион ауааҧсыра роуп. Урҭ рҕьырак аџьармыкьа ахь, мамзаргьы ахәышәтәырҭақәа рҿы ишьҭоу рыуацәа-рҭахцәа рбарц ицоит, иара убас, аҳәаа иахысуа Егрытәи Аӡфымцастанциа аусзуҩцәеи жәларбжьаратәи аиҿкаарақәа рхаҭарнакцәеи роуп”.

Ҭемыр Надараиа иҟаиҵаз адыррақәа рыла: “2014 шықәса рзы аҳәаа аҩ-ганк рыла иахысит 1 миллионки 112 нызқь-ҩык ауааҧсыра, 2015 шықәса рзы – 1 миллионки 127 нызқь-ҩык, 2016 шықәса жәымз ирылагӡаны – 1 миллионки 083 нызқь-ҩык. Убри аан, ҧхынҷкәын – Аушьҭра-гәаҭаратә Ҧыҧшырҭа ала еиҳарак ауааҧсыра анахысуа аамҭаны иҧхьаӡоуп. Сынтәа акәзар, иҟоу азгәаҭарақәа рыла, аҳәаа аҩ-ганк рыла иахысраны иҟоу ауааҧсыра рхыҧхьаӡара 2014 шықәса раасҭа 80-нызқь-ҩык рыла еиҳахар алшоит”.


(АП): Ааигәа, Аполитикатә Партиа “Амцахара” аизара Ду аҿы иқәгылаз Ареспубликатә уаажәларратә еиҿкаара “Кьараз” анаҧхгаҩы Дмитри Дбар иҳәеит: “2015 шықәса иалагӡаны Егры аӡиас ала ицо аҳәынҭқарратә ҳәаа аҩ-ганк рыла ииасыз ауаа рхыҧхьаӡара 441 нызқь 509-ҩык рҟынӡа инаӡоит. Шәхахьы иаажәг абарҭ арбагақәа! 2016 шықәса, х-ҧшьбарак ирылагӡаны, аҳәаа иахысит 566 нызқь 816-ҩык ауаа. Ас еиҧш аусқәа рышьақәгылара зыхҟьаз атәы ҳазҳәода?! Убри аан, иарбоу аҳәаа Аҧсни, уи иаҕоу аҳәынҭқарреи ишрыбжьоу атәы агәаларшәара аҭахума?! Рыцҳарас иҟалаз, ацәажәара ҕәҕәа зцыз, аҧыҧшырҭақәа рхыҧхьаӡара армаҷреи аҳәаа арҕәҕәареи ирыдҳәалоу аунагӡатәқәа гәыгәҭажьны иаанхеит!”.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа