Ажәабжьқәа

Популярное

Еицырдыруа азинхьчаҩ Зураб Ачба дыршьижьҭеи 15 шықәса ҵит

505
15.08.2015 08:17
Еицырдыруа азинхьчаҩ Зураб Ачба дыршьижьҭеи 15 шықәса ҵит
Ауаажәларратә-политикатә усзуҩ, еицырдыруа азинхьчаҩ, Аԥсны Иреиҳаӡоу Асовет-Апарламент адепутат Зураб Ачба 2000 шықәса август 15 рзы дшьын. 

Сухум. Август 15. Аԥсныпресс. “Сынтәа, август 15 рзы Зураб Ачба дҳалагыламижьҭеи жәохә шықәса ҵуеит. Уи иқәгаразы адҵа ҟазҵази уи назыгӡази, аԥсуа жәлари аԥсуа ҳәынҭқарреи иаӷацәоуп. Избан акәзар, уи баша аҵара бзиа змаз уаҩымызт, уи даныстудентыз инаркны анцәа иҟынтәи абаҩхатәра зауз азиндырҩы ҳәа ишьҭан. Убри инамаданы, иузхамырҭәаауа аҭыԥ ыҟам шырҳәогьы, Зураб Ачба залымдарыла дҳаԥхеижьҭеи жәохә шықәса шыҵхьоугьы, уи иҭыԥ уажәыгьы ишхарҭәаам азгәазҭо даара ирацәаҩуп”, – лҳәеит Зураб Ачба ихьӡ зху аҵарадырратә центр “Адунеи Амч ахархәарада” аиҳабы Далила Ԥлиаԥҳа. 

Уи лажәақәа рыла, Зураб Ачба иԥсы анҭаз, ас еиԥш ацентр аԥҵара ӷәҭакыс иман. “Ари аполитикатә центр зеиԥшрахар иҭаху азы имаз агәаанагара изныкымкәа иҳаиҳәахьан. Убри аан, зегь реиҳа аҿар ракәын дзықәгәыӷуаз. Уи иажәақәа рыла, еиҵагыло абиԥара зхы иақәиҭу, азакәан иқәныҟәо, аҵара бзиа змоу уааны иҟалароуп. Абасала, заԥҵара игәы иҭаз ари аклуб ахь қәрала, милаҭла, динхаҵарала еиуеиԥшымыз ауаа адҵаалаларц иҭахын. Ара дазусҭазаалакгьы игәаанагара аартны иҳәартә, уи раҳартә аҭагылазаашьа иоурц иҭахын. Аха, рыцҳарас иҟалаз, уи игәахәтәы дахьырмыгӡеит”. 

“Зураб Ачба гәнаҳарыла даныршь ашьҭахь, сара есымшагьы исҳәон, уи игәазыҳәара наҳмыгӡар Анцәагьы иаҳџьишьом ҳәа. Акызаҵәык, ацентр “Адунеи Амч ахархәарада” ҳәа ахьӡ аҭаразы адгалара ҟасҵеит, избан акәзар уи амч ахархәара аҿагылара иахаҭараны иҟалеит. Зураб Ачба гәыла-дала зхы иақәиҭыз, алаф ҳәара бзиа избоз уаҩын”, – ҳәа иазгәалҭеит Далила Ԥлиаԥха. 

Уи лгәалашәарақәа дрылацәажәо иазгәалҭеит, “Иаартцәаны зегьы урылацәажәоит, ҳазҭагылоу аамҭа гәаҭ, иузааигәоу реиԥш иуцәтәымуааугьы рыбжьара цәгьашақә иузыҟоу рацәаҩуп, уахыршьаар ҟалоит ҳәа аниарҳәалак, уи длафны, ишԥааури нас, исымырхгәышьааит смаланыҟәа заҵәы, уи ауп сара дуӡӡа сныҟәгара зылшо. Аха сыршьыҵәҟьаны сҟалозар, акы заҵәык ауп сгәы иало, шаҟа кьыла сыҟоу уаазхәыцны, сышьҭыхра зықәшәо аҷкәынцәа аарыцҳаушьартә иҟоуп, ҳәа дԥышәырччо ҿааиҭуан уи. Абасала, алаф ахь ииаго, дызҭагылаз ашәарҭара ихаҿы иааигомызт, дуаҩы иашаны дуаҩы разны дшыҟаз ала, ишьра аӡәы иӷәаӷьып ҳәа ихеиҵомызт”. 

“Ҳара еиҿаҳкааз ацентр арҵаратә хырхарҭа амоуп, избан акәзар, уи зыхьӡ аху ауаҩы-азиндырҩы еиҵагыло аҿар даара ахшыҩзышьҭра риҭон, игәыӷрақәагьы рыдиҳәалон. Саргьы, рҵаҩык иаҳасабала, абиԥара ҿыц ҳҳәынҭқарра аиҭарҿиареи ашьақәгылареи рылшартә азы иахәҭоу аҵареи ахдырреи рымазароуп ҳәа исыԥхьаӡоит. Ҳара ҳцентр иаҭаахьо, адыррақәа зауз ауаа даара рхыԥхьаӡара рацәоуп. Урҭ зегьы ҳрызгәдууп. Иахьа дара рыԥсҭазааратә мҩа ииашаны иахьалархыз, ирымоу азанааҭ шьахәла рхы иахьадырхәо даара ҳаигәырӷьоит”, –ҳәа “Аԥсныпресс” акорреспондент диҿцәажәо инаҵшьны иазгәалҭеит Далила Ԥлиаԥҳа.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа