Ажәабжьқәа

Популярное

Денис Ҭаниа: ҳазҭоу ашықәс жәымз ирылагӡаны арҩышьыгатә маҭәашьарқәа зинда рырмазеира, раахәара, рыҵәахра, рлага-ҩагара, ма рыҭира иадҳәалоу 134 инарзынаҧшуа афактқәа аарҧшуп

139
03.11.2017 12:53
Денис Ҭаниа: ҳазҭоу ашықәс жәымз ирылагӡаны арҩышьыгатә маҭәашьарқәа  зинда рырмазеира, раахәара, рыҵәахра, рлага-ҩагара, ма рыҭира иадҳәалоу 134 инарзынаҧшуа афактқәа аарҧшуп
Аҧсны аҩныҵҟатәи аусқәа Рминистрра аҿы 2017 шықәса жәымз ирылагӡаны ахылаҧшырҭа аусура аихшьаалақәа рыҟаҵара иазкны инарҭбаау аилатәара мҩаҧысит.

Аҟәа. Абҵарамза 3. Аҧсныпресс. Дамеи Касланӡиа. Аколлегиа инарҭбаау аилатәара аҿы  аҩныҵҟатәи аусқәа Рминистрра Аштаб анаҧхгаҩы ихаҭыҧуаҩ Денис Ҭаниа арҩышьыгатә маҭәашьарқәа зинда реикәаршара иазкны Аусбарҭа аусара азы адыррақәа ҟаиҵеит.

“Атәыла Анаҧхгареи аҩныҵҟатәи аусқәа Рминистрреи азинхьчаратә система ихадоу аусуратә хырхарҭа аҳасабала арҩышьыгатә маҭәашьарқәа зинда реикәаршареи урҭ рхархәареи рҿагылара алыркааит”, – ҳәа иазгәеиҭеит Денис Ҭаниа. 

Аҩныҵҟатәи аусқәа Рминистрра Аштаб анаҧхгаҩы ихаҭыҧуаҩ Денис Ҭаниа, “аоперативтә-ҧшааратә усмҩаҧгатәқәа ҳтәыла иаҧну аҳәынҭқаррақәа рҟынтәи хыҧхьаӡара рацәала ишаауа дырҵабыргуеит” ҳәа иазгәеиҭеит. 
 
Денис Ҭаниа иҟаиҵаз адыррақәа рыла, иарбоу аамҭахәҭа азы арҩышьыгатә маҭәашьарқәа  зинда рырмазеира, раахәара, рыҵәахра, рлага-ҩагара, ма рыҭира иадҳәалоу 134, иҳаҩсыз ашықәса азы аиҧш-зеиҧшу аамҭахәҭа азы – 85  инарзынаҧшуа афактқәа аарҧшуп. Ихацыркуп 124 шьауҕатә усеилыргара, урҭ рыла 144-ҩык ашьауҕатә қәнага иақәыршәоуп, урҭ рыбжьара 13-ҩык Урыстәылатәи афедерациа атәылауаа роуп.  

Иарбоу аамҭахәҭа азы 1 400-ҩык аанкыланы амедицинатә шьақәырҕәҕәара азы Ареспубликатә наркодиспансер ахь инагоуп, урҭ рахьынтә 272-ҩык арҩышьыгатә маҭәашьарқәа рылаҵаны иҟан, 326-ҩык амедицинатә шьақәырҕәҕәара иадҳәалоу апроцедура ахысра мап ацәыркит.  

Ацәгьоуратә гәыҧқәа 7 аарҧшуп, урҭ рахьынтә 4 Урыстәылатәи Афедерациа атәылаауа рыла ишьақәгылоуп, ҩба- аҭыҧантәи ауааҧсыра рыла, акы-еилоуп.

“Дарбанызаалак еиликаауазар акәхап, арҭ ауаа хыҧхьаӡара рацәала арҩышьыгатә маҭәшьарқәа рыҭира  ишалахәыз, аӡәырҩы аҿар рыҧсҭазаара урҭ рыламыс ишаҵанакхьоу”, – ҳәа иҳәеит Денис Ҭаниа.  

Ареспублика аҿы ирымхуп 347, 772 гр “метадон”, 4 кг 198,53 гр “каннабис” (марихуана), “маковаиа соломка”. 9,288 гр ҳәа изышьҭоу арҩышьыгатә маҭәашьарқәа.

 Аҧсны иахьаҵанакуа зылаҵареи заарыхреи рзы азин ыҟам аҵиаақәа раарыхреи рхархәареи апрофилактика аҟаҵаразы атәыла азинхьчаратә усбарҭақәа рыла иаарҧшуп иагьрылгоуп “мак” ҳәа изышьҭоу аҵиаахкы 121 шьапы, 447 шьапы “коноплиа” ҳәа изышьҭоу аҵиаахкы. 

“Арҩышьыгатә маҭәашьарқәа рыларҵәареи, рхархәареи, раарыхреи Аҧсныҟа раагареи иамоу амҽхак ҳасаб азуны уахәаҧшуазар, иарбоу ахырхарҭала ишьақәгылаз аҭагылазаашьа акыр иуадаҩуп ҳәа уҳәар алшоит. Арҩышьыгатә маҭәашьарқәа зинда реикәыршара ахылаҧшра рҕәҕәатәуп, заарыхра ҟамло аҵиаақәа мҽхакы ҭбаала еиҭазҳауа ауаа раанкылара хымҧадатәиуп”, – ҳәа иажәа хыркәшо инаҵшьны иазгәеиҭеит аҩныҵҟатәи аусқәа Рминистрра Аштаб анаҧхгаҩы ихаҭыҧуаҩ Денис Ҭаниа.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа