Ажәабжьқәа

Популярное

Даур Ақаҩба: Қырҭтәыла аҩныҵҟатәи аиҿагылара аҿы аҧснытәи афактор активла ахархәара аиуит

69
13.06.2019 09:30
Даур Ақаҩба: Қырҭтәыла аҩныҵҟатәи аиҿагылара аҿы аҧснытәи афактор активла ахархәара аиуит
Аҧсны адәныҟатәи аусқәа Рминистрра аҿы Еиду Амилаҭқәа Реиҿкаареи, Европа атәылақәа Реидгылареи, Европа Атәылақәа ршәарҭадара Аиҿкаареи (ООН, ЕС ,ОБСЕ) ахаҭарнакцәа злахәыз аилатәара мҩаҧысит.

Аҟәа. Рашәарамза 13. Аҧсныпресс. Дырмит Басариа. Аҧсны адәныҟатәи аусқәа Рминистрра аҿы Кавказ анҭыҵ аҭынчреи аҭышәынтәалареи рзы Женеватәи аилацәажәарақәа рыцхантәаҩцәа рҧылара мҩаҧысит. Аиҧылара ахықәкы хада – имҩаҧысраны иҟоу Женеватәи аилацәажәарақәа 48-тәи араунд аҽазыҟаҵаратә еилацәажәарақәа рымҩаҧгара ауп.

Аҧсны адәныҟатәи аусқәа рминистр Даур Ақаҩба аҧсуа ган ақырҭуа ган ахь иамоу аҽҧынкыларақәа аликааит: “Ҳара Қырҭтәыла анапхгара адунеи ауаажәларра рҿаҧхьа Аҧсны акәша-мыкәша ишьақәгылаз аҭагылазаашьа дара ишырзыманшәалоу ала аарҧшра атенденциа шалнахыз акыр ҵуеит игәаҭаны иҳамоуижьҭеи. Аҵыхәтәантәи аамҭазы Қырҭтәыла аҩныҵҟатәи аиҿагылара аҿы аҧснытәи афактор активла ахархәара шамоу убасҵәҟьа иумбар залшом. Убас, апартиа “Европейская Грузия” “Отхозория-Татунашвили” асиа ашьақәыргылара аҧшьнагеит. Ас еиҧш ахымҩаҧгашьа аиҿцәажәаратә процесс азы хра злоу ҳәа акгьы шамам азы ҳара ҳганахьала агәаҽанызаарақәа шыҟазгьы, қырҭтәыла анапхгара уезгьы иарбоу асиа адгылара анаҭеит. Убри инамаданы, уи Аинцидентқәа рыҧхьырҟәҟәаареи рызхьаҧшреи рзы Амехенизм аҳәаақәа ирҭагӡаны имҩаҧысуаз аиҿцәажәарақәа акыр ирҧырхагахеит. Ус ишыҟоугьы, Қырҭтәыла анапхгара ари асиа ахархәара мҩаҧнагоит, иара убри ала асанкциақәа рымҩаҧгара иацнаҵоит. Қырҭтәыла анапхгара аганахьала ас еиҧш ауснагӡатәқәа рымҩаҧгара, апартиа “Европейская Грузия” аганахьала аполитикатә қәыҕәҕәара иалцҵшәахеит.

Иара убас, Даур Ақаҩба Қырҭтәыла аҧыза-министр Мамука Бахтаӡе, рашәарамза 3 рзы Қырҭтәылатәи Апарламент аҿаҧхьа зыдгалара мҩаҧгаз, 2018-2020 шш. анапхгаратә программа анагӡара шымҩаҧысуа азы иҟаиҵаз ажәахә аганахьала агәҭынчымра ааирҧшит: “Ажәахә аҿы даара иџьоушьаша аҳәамҭа ҟаҵан. Уаҟа 2018 шықәсазы Қырҭтәыла анапхгара 600 нызықь лари амармалташьтә пты ақәхразы ахимиатә маҭәашьарқәа раахәаразы Аҧсны иазоунажьызшәа адырра ҟаҵан. Сара, Аҧсны анапхгара Қырҭтәыла аҟынтәи изеиҧшразаалак ацхыраара ҳәа акгьы шаднамкылахьо азы ҭакҧхықәрала аҳәамҭа ҟасҵоит. Амармалташьтә птәы ақәыхразы амаҭәашьарқәа зегьы Аҧсныҟа иаауан Қырҭтәыла абиуџьет изеиҧшразаалак акала иадҳәалам жәларбжьаратәи аиҿкаарақәа рыцхыраарала. Аҭагылазаашьа еиҳагьы аилыркааразы, ҳара Қырҭтәыла анапхгара аҧсуа ган амаҭәашьарқәа шанаҭаз, насгьы аҧсуа ган уи шаднакылаз зырҵабыргуа аусшәҟәқәа радгадара алнаршарц азы адҵа ықәҳаргылоит. Қырҭтәыла анапхгара иреиҳаӡоу амаҵурауаа рҟынтәи ас еиҧш ацәажәарақәеи аҳәамҭақәеи шәареи ҳареи имҩаҧаагахьоу аусура зегьы ҕәҕәала еиҧнарҟьоит. Агәыҕра сымоуп, ҳара Женева арҭ азҵаарақәа рылацәажәара азы алшара ҳауп ҳәа”.

Женеватәи аилацәажәарақәа рҿы Еиду Амилаҭқәа Реиҿкаара Иҷыдоу Ахаҭарнак аполитикатә бжьагаҩ еиҳабы Хаилу Мамо, Женеватәи аилацәажәарақәа 48-тәи араунд аҳәаақәа ирҭагӡаны имҩаҧгахо аконсультациақәа хра злоу акакәны ишыҟало азы агәыҕра ааирҧшит: “Имҩаҧысраны иҟоу аконсультациақәа ахықәкы хадақәа иреиуоуп – Аинцидентқәа рыҧхьырҟәҟәаареи рызхьаҧшреи рзы Амехенизм (МПРИ) аформат аиҭашьақәыргылара алыршара. Уи деталла алацәажәара иахьатәи ҳаиҧылараҿы иазҧхьагәаҭаны иҳамоуп”.

Кавказ анҭыҵ аҭынчреи аҭышәынтәалареи рзы Женеватәи аилацәажәарақәа 48-тәи араунд амҩаҧгара азҧхьагәаҭоуп  ҧхынгәымза 2-3, 2019 шықәса рзы.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа