Ажәабжьқәа

Данил Убириа: ҳажәлар рхатәы бызшәа рмыхьчар, уи иуадаҩу ахҟьаҧҟьа цәырнагар алшоит

101
17.07.2019 16:27
Данил Убириа: ҳажәлар рхатәы бызшәа рмыхьчар, уи иуадаҩу ахҟьаҧҟьа цәырнагар алшоит
Аҧсны Ауаажәларратә Палата аҿы аҧсуа бызшәа аҿиара иадҳәалоу апроблема азы аилацәажәара мҩаҧысит.

Аҟәа. Ҧхынгәымза 17. Аҧсныпресс. Мадина Чагәааҧҳа. Аҧсны ауаажәларратә Палата аҿы аҧсуа бызшәа аҿиара иадҳәалоу апроблема азы инарҭбаау аилацәажәара мҩаҧысит.

Аилатәара аартуа, Ауаажәларратә Палата амаӡаныҟәгаҩ ихаҭыҧуаҩ Данил Убириа, аҧсуа бызшәа аҿиара иазырханы мҽхакы ҭбаала аусура шымҩаҧысуагьы, аусқәа рҭагылазаашьа агәҭынчымра узцәырнамгар залшом хәа инаҵшьны иазгәеиҭеит: “Зхыҧхьаӡара маҷу ҳажәлар рхатәы бызшәа рмыхьчар, уи иуадаҩу ахҟьаҧҟьа цәырнагар алшоит, амилаҭ рықәӡаарагьы уахь иналаҵаны. Иахәҭоу аидеалогиа аҭахуп, абызшәа аҵара шхымҧадатәиу ауаажәларра рыхдырра аҟынӡа анагара алыршатәуп”.

Аҧсуа бызшәа аҿиара апроблемақәа рыҭҵаара азы Ауаажәларратә Палата акомисиа анапхгаҩы Рудольф Алшәындба иара убас, ахатәы бызшәа аҿиара азы хыҧхьаӡара рацәала азакәанқәеи ҷыдала еиҿкаау аструктурақәеи шыҟоугьы, аҭагылазаашьа шыуадаҩыц иаанхоит ҳәа иазгәеиҭеит.

Ари аҩыза агәаанагара дақәшаҳаҭхеит аҳәынҭқарратә бызшәатә политика азы Аилак ахантәаҩы Баҭал Ҳагәышь: “Аҳәынҭқарратә бызшәа азы Азакәан инагӡаны аус ауӡом, избан акәзар уи иацааиуа аусмҩаҧгатәқәеи аресурсқәеи аҭахуп. Аҳәынҭқарра аҩныҵҟа ашәҟәқәеи аусшәҟәқәеи зегьы аурыс бызшәа еиҧш аҧсуа бызшәалагьы иҭыжьзар ахәҭоуп. Ҳара егьырҭ адҵақәа рыҭара ҳааҟәыҵны, ҳхаҭақәа ҳҟынтәи ҳалагароуп. Еуеиҧшым аструктурақәа русзуҩцәа рхатәы бызшәала ицәажәозароуп. Ауаҩы ихатәы бызшәа адырра Аҧсны аусуразы ишхымҧадатәиу анеиликаалак ашьҭахь ауп уи аҵара даналаго. Аизарақәеи аилатәарақәеи зегьы аҧсуа бызшәала имҩаҧысуазароуп, иара убас аӡыргақәа, амультфильмқәа, амобилтә ацҵақәеи, уҳәа зегьы аҧсуа бызшәала инагӡазароуп”.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа