Ажәабжьқәа

Популярное

Беслан Барцыц Анаҧхгарабжьаратәи акомиссиа аусуразы: хықәкылатәи алҵшәа аиуразы иалху аусуратә ритм ауп ихымҧадатәны иҟоу

712
17.08.2016 10:54
Беслан Барцыц Анаҧхгарабжьаратәи акомиссиа аусуразы: хықәкылатәи алҵшәа аиуразы иалху аусуратә ритм ауп ихымҧадатәны иҟоу
Москва ақалақь Ареспублика Аҧсни Урыстәылатәи афедерациеи рыбжьара асоциал-економикатә усеицуразы Анаҧхгарабжьаратә комиссиа ажәахатәи аилатәара хыркәшахеит.

Аҟәа. Нанҳәамза 17. Аҧсныпресс. Аҧснытәи Ареспублика аминистрцәа Реилазаара аофициалтә саит аҿы иҟоу адыррақәа рыла, Анаҧхгарабжьаратә комиссиа ажәахатәи аилатәара иалагӡаны, аганқәа Аҧсны асоциал-економикатә ҿиаразы афинанстә цхыраара аҭара иадҳәалоу азҵаарақәа ирылацәажәеит.

Аҧсны анаҧхгара ахада, Анаҧхгарабжьаратәи акомиссиа аҧсуа ҟәша ахантәаҩы Беслан Барцыц, хықәкылатәи алҵшәа аиуразы иалху аусуратә ритм ауп ихымҧадатәины иҟоу ҳәа иазгәеиҭеит.

“Сара сгәаанагарала хықәкылатәи алҵшәа аиуразы иалху аусуратә аритм ауп ихымҧадатәины иҟоу. Уи, ахәҭакахьала, Аҧсны асоциал-економикатә ҿиара ахырхарҭа ала ҳусеицура иадҳәалоуп”, – ҳәа инаҵшьны иазгәеиҭеит Беслан Барцыц.

Урыстәылатәи Афедерациа анаҧхгара Ахантәаҩы ихаҭыҧуаҩ, Анаҧхгарабжьаратәи акомиссиа урыстәылатәи аҟәша ахантәаҩы ихаҭыҧуаҩ Александр Хлопонин ишазгәеиҭаз ала, Урыстәылатәи Афедерациа, ҳазҭоу ашықәс иалагӡаны, Аҧсны афинанстә цхыраара инагӡаны аҭара азҧхьагәаҭоуп.

Убри аан, Нхыҵ Кавказ аусқәа рыла Урыстәылатәи Афедерациа аминистр ихаҭыҧуаҩ Андреи Резников ахыҧхьаӡаратә еихшьаалақәа ҟаиҵеит. Уи иҟаиҵаз адыррақәа рыла, 2016 шықәсазы Аҧсны афинанстә цхыраара аҭаразы 3 млрд. мааҭ рҟынӡа азоужьра азҧхьагәаҭоуп. Иахьазы, Нхыҵ Кавказ аусқәа рыла Урыстәылатәи Афедерациа Аминистрра афинанстә цхыраара азоужьра ахылаҧшҩы хада аҳасабала, Ареспублика Аҧсны азеиҧш еицҵалыҵ аҟынтәи 56% рыиагара алнаршахьеит.

Аилатәара алахәылацәа иара убас, Ареспублика Аҧсны 2015-2017 шықәсқәа рзы асоциал-економикатә ҿиаразы Аинвестициатә программа анагӡара иалацәажәеит.

“Хы-шықәса ирылагӡоу Аинвестициатә программа аҳәаақәа ирҭагӡаны, иҟаҵоу афинанстәра азеиҧш шәагаа 9,3 млрд. мааҭ рҟынӡа инаӡоит. 2016 шықәсазы зфинанстәра азеиҧш шәагаа 2,486 млрд. мааҭ рҟынӡа инаӡо 266 апроектқәа рынагӡара азҧхьагәаҭоуп”, – ҳәа иҳәеит Андреи Резников.

Аилатәара ахыркәшамҭаз, аганқәа аусеицура иаанарҧшуа алҵшәа бзиақәа ҳасаб азуны, аринахысгьы аконструктивра злоу аусеицуразы агәыҕра шрымоу азгәарҭеит.

Аилатәара аихшьаалақәа рыҟаҵара ашьҭахь аилатәара аҧкаанҵа анапаҵыҩра иадҳәалоу ацеремониа мҩаҧган. Урыстәылатәи Афедерациа аган аҟынтәи Анаҧхгарабжьаратәи акомиссиа ажәахатәи аилатәара аҧкаанҵа инапы аҵаиҩит Урыстәылатәи Афедерациа анаҧхгара Ахантәаҩы ихаҭыҧуаҩ Александр Хлопонин, аҧсуа ган ахьӡала – Ареспублика Аҧсны аҧыза-министр Беслан Барцыц.

Анаҧхгарабжьаратәи акомиссиа анаҩстәи аилатәара, ҳазҭоу ашықәс аҧшьбатәи аҧшьбарак азы, Аҟәа ақалақь аҿы имҩаҧгахоит.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа