Ажәабжьқәа

Популярное

Баграт Хәытаба: Аҧсны аспорт аҿиара астратегиа аус адулахоит

73
17.06.2019 13:22
Баграт Хәытаба: Аҧсны аспорт аҿиара астратегиа аус адулахоит
Аҧсны абҩарҵәыреи аспорти рзы аҳәынҭқарратә Еилакы ахантәаҩы Баграт Хәытаба аминистрцәа Реилазаара апресс-маҵзура еиҭаз аинтервиу аҿы ареспублика аҿы аспорт аҿиара иадҳәалоу апроблемақәеи, атәыла ақыҭақәа рҿы аспорттә программақәеи, анапхгарабжьаратәи аиқәшаҳаҭрақәеи дрылацәажәеит.

Аҟәа. Ршәарамза 14. Аҧсныпресс. Аҧсны абҩарҵәыреи аспорти рзы аҳәынҭқарратә Еилакы ахантәаҩы Баграт Хәытаба, ахәҭакахьала, рыцҳарас иҟалаз, иахьатәи амш азы, хыҧхьаӡара рацәала аҿар абҩарҵәыреи аспорти рыла аҽазыҟаҵареи иреиҳаӡоу аихьӡарақәа раиуреи рзы радыҧхьалара иазырханы иахәҭоу аспорттә аинфраструктура ыҟаӡам ҳәа иазгәеиҭеит.

“Ареспублика аҿы иҟазар ахәҭоуп аӡысратә ӡҭарчқәа, афункциарацәатә спорттә ргыламҭақәа, абжьаратәи ашколқәа рҿы аспорттә залқәеи, араионқәа рҿы иҟоу ашьапылампыл дәқәеи шьаҭанкыла аиҭашьақәыргылареи, аҧратә спорт аҿиаразы аматериал-техникатә база аҧҵареи хымҧадатәиуп”, – ҳәа игәаанагара иҳәеит Баграт Хәытаба. 

Убри аан, Баграт Хәытаба, атәыла Анапхгара анапынҵала, 10-15 шықәса ирҭагӡоу аспорт аҿиара астратегиа аус адулара мҩаҧысуеит, иара убри аҧсҭазаараҿы анагӡара иабзоураны, Аҧсны аспорт  зегь реиҳа ихадоу хырхарҭаны иҟалар алшоит ҳәа иазгәеиҭеит. 

Баграт Хәытаба астатистикатә дыррақәа ааигеит: “Атәыла аҿы иҟоуп 132 аспорттә шьақәгылагақәа. Уи ахыҧхьаӡараҿы иҟоуп ареспубликатәи аҭыҧантәи ҵакы змоу 14 стадион, иара убас аспорттә залқәеи, егьырҭ аргыламҭақәеи. Аспорттә школқәа ракәзар, урҭ рхыҧхьаӡара 15 рҟынӡа инаӡоит. Урҭ ирыҵанакуа адәқәа рҿы аус руеит еиуеиҧшым аспорттә секциақәа: ашьапылампыл, анапылампыл, атлетика ласы, амҵәышәмпыл, ашахматқәа, зхы иақәиҭу аиқәҧара, абокс. Аспорттә секциақәа рҿы зҽазыҟазҵо рхыҧхьаӡара 12 500-ҩык рҟынӡа инаӡоит, ареспублика аҿы аус зуа азыҟаҵаҩцәа рхыҧхьаӡара наӡоит 200-ҩык рҟынӡа. Аҳәынҭқарратә Еилакы аҿы 2019 шықәса иалагӡаны иазҧхьагәаҭоуп Аҧсны иахьаҵанакуа 60 усмҩаҧгатә, уи анҭыҵ – 60 инареиҳаны”. 

Иара убас, Баграт Хәытаба Аҧсны ақыҭақәа рҿы аспорт аҿиара иазырхоу апрограммақәа дрылацәажәеит. Убас, уи иажәақәа рыла, 2017 шықәсазы Аҧсны ақыҭақәа рҿы “Згәы бзиоу абиҧара” ҳәа абҩарҵәыреи аспорти рыҿиара апрограмма еиқәыршәан. 20 инареиҳаны ақыҭа школқәа хәҭакахьала аспорттә инвентарь ала еиқәыршәан. 

“Ас еиҧш апрограмма есышықәса иааиҧмырҟьаӡакәа  анагӡареи, Аҧсны ақыҭақәа рышколқәа рыбжьара аспорттә-массатә усмҩаҧгатәқәа рымҩаҧгареи хымпадатәны иҳаҧхьаӡоит”, – ҳәа иажәа инациҵеит Баграт Хәытаба. Амилаҭтә спорттә хкқәа рыҿиара дазааҭгыло, абҩарҵәыреи аспорти рзы аҳәынҭқарратә Еилакы ахантәаҩы Баграт Хәытаба аҽыбҕаҟазаратә спорти  ахыци ахәымпали рыла ахысреи ҷыдала дазааҭгылеит. 

“Есышықәса ареспублика аҿы хәба инареиҳаны аспорттә ҽыбҕаҟазаратә усмҩаҧгатәқәа еиҿкаахоит. Араҟа аҽырхәмарра, аҳәаҟьара, аҵәыршәра, ҽыла ашьапылампыл асра, иара убас “абызшьҭыхра” ҳәа изышьҭоу ахәмарра, уҳәа рыла аидаҭларақәа мҩаҧысуеит”, – ҳәа еиҭеиҳәеит Баграт Хәытаба. 

Аха, Баграт Хәытаба игәаанагарала, аҽыбҕҟазаратә спорт аҿиаразы иахьа иҟоу аматериал-техникатә база хымҧада иацҵатәуп. 

Аҳәынҭқарратә Еилакы ахантәаҩы аспорттә ҧышәа аимдара алзыршо аҩганктәи аиқәшаҳаҭрақәа аликааит: “Урыстәылатәи Афдерациа аспорт Аминистрреи ҳареи Амеморандум ҳабжьаҳҵеит. Иара убас, Аҧсны аолимпиатә еилакқәеи Шьамтәылатәи Арабтәи Ареспубликеи рыбжьара аусеицуразы Аикәшаҳаҭра анапаҵыҩра алыршахеит. Убасҵәҟьа, аҧснытәии урыстәылатәии аспорттә федерациақәа рыбжьара еиуеиҧшым аиқәшаҳаҭрақәа бжьаҵоуп”.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа