Ажәабжьқәа

Популярное

Атроллеибусқәа аҳҭнықалақь аҿы иныҟәоижьҭеи 50-шықәса ҵуеит

769
12.01.2018 14:26
Атроллеибусқәа аҳҭнықалақь аҿы иныҟәоижьҭеи 50-шықәса ҵуеит
Аҟәа ақалақь Ахадара иатәу Амуниципалтә Унитартә Наплакы “Атроллеибустә усбарҭа” аҧҵахеижьҭеи 50-шықәса аҵра азгәанаҭоит.

Аҟәа. Ажьырныҳәамза 12. Аҧсныпресс. Дамеи Касланӡиа. Аҟәатәи атроллеибустә Усбарҭа аус ауеижьҭеи абар шьҭа 50-шықәса ҵуеит. Ари аиубилеитә рыцхә инамаданы, Аусбарҭа аусзуҩцәа шықәсырацәала ламысцқьала русура азы аҳаҭыртә шәҟәқәа ранашьахеит. Ари аныҳәатә усмҩаҧгатә ихы алаирхәит Аҟәа ақалақь ахада ихаҭыҧуаҩ Леон Кәарҷиа.



Аҟәатәи атроллеибустә Усбарҭа ахантәаҩы Иури Барганџьиа иазгәеиҭеит: “Ҳара абар шьҭа ашәышықәса рыбжа аус ааухьеит. Ари арыцхә ҳара ҳзы акыр аанагоит. Ҳара ҳаиҿкаара Аџьынџьтәылатәи еибашьра ашықәсқәа раан акыр имариамыз амҩа ианысит. Аибашьра ашьҭахь атроллеибусқәа рҕьырак реиҭашьақәыргылара акыр ишыуадаҩызгьы, ҳусуҩцәа рымчала урҭ ақалақь ахь рцәырҵра аиҿкаара алыршахеит. Ҳара раҧхьатәи атролеибусқәа ацәаҳәа ахь иандәықәаҳҵа, ауаа ргәырҕьара ҳәаа амаӡамызт, урҭ еилыркаауан аҧсҭазаара ҩаҧхьа ишацҵахо. Аиубилеи – атроллеибустә Усбарҭа аҿиара изаамҭанытәиу аетап ауп, уи аусураҿы иҳалшази макьаназы иҟаҵатәны ҳаҧхьа ишьҭоуи зегьы ҳасаб рзура азы зеиҕьаҟам лшараны иҟоуп, иара убас атәыла ауааҧсыра рымаҵ аура аус аҿы аихьӡара ҿыцқәа раиура аҿазышәарақәа рзы азҧхьагәаҭарақәа рыҟаҵара иамшны иҟоуп”.



Ахәҭакахьала, Леон Кәарҷиа Анаплакы аусзуҩцәа аиубилеи рыдиныҳәалеит: “Есыҽны Шәара ҳақалақь ауааҧсыреи уи иаҭаауа асасцәеи рымаҵ аура шәаҿуп. Атроллеибусқәа аекологиа акала аҧхасҭа азымҭо, убри аан зыхәҧса ҳаракым, ауааҧсыра рҕьырак рхы иадырхәо атранспорт хкқәы иреиуоуп. Атроллеибустә Усбарҭа аусура еиҳарак актуалра аиуоит имариам асоциал-економикатә ҭагылазаашьа аҿы, уи еиҳарак социалла ихьчам, зматериалтә ҭагылазаашьа уадаҩу ауааҧсыра ркатегориа рымаҵ аура иазырхоуп. Иара убри азы ауп ақалақь Ахадара  ари атранспорт хкы ала аныҟәара ахәҧса илаҟәу атариф аҿы аанкылареи шәнаплакы аусураҿы ацхыраара аҭареи рзы иалшо зегьы заҟанаҵо”.

  
(АП): Аҟәа атроллеибусттә система ажьырныҳәамза 3, 1968 шықәса рзы иаартын. Аныҟәара Турбаза аҳабла инаркны усҟан Дзержински ихьӡ зхыз, иахьа Гумсҭатәи амҩеи Ешба ихьӡ зху амҩеи реихысырҭа аҟынӡа инагаз ацәаҳәа ала идәықәҵаз 7 троллеибус ЗиУ-5Г рыла иаартын. Атроллебустә система ашьақәгылара раҧхьатәи ашықәсқәа рзы атроллеибусқәа  аремонт аҟаҵареи уахынла аанкылареи иара аулицақәа рҿы акәын иахьымҩаҧысуаз. Иара убри ашықәс азы ақалақь иаиуит ЗиУ-682 и Шкода-9Тр иатәыз раҧхьатәи атроллеибусқәа. Урҭ анаҩс ишьақәгылаз атроллеибустә парк иашьаҭаны иҟалеит. Абас ала атроллеибусқәа аҳҭнықалақь аҿы иныҟәоижьҭеи абар шьҭа 50-шықәса ҵуеит.  


Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа