Ажәабжьқәа

Популярное

Аслан Кәабахьиа: азинхьчаратә усбарҭақәа анаркотикатә маҭәашьарқәа рыларҵәара иаҿу ацәгьоуцәа ҕәҕәала ирҿагылоит

636
17.08.2016 13:24
Аслан Кәабахьиа: азинхьчаратә усбарҭақәа анаркотикатә маҭәашьарқәа рыларҵәара иаҿу ацәгьоуцәа ҕәҕәала ирҿагылоит
Аҧсны аҧыза-министр ихаҭыҧуаҩ, атәыла аҩныҵҟатәи аусқәа рминистр Аслан Кәабахьиа ажурналистцәа рзы имҩаҧигаз абрифинг аҿы, наҧхгара зиҭо ахылаҧшырҭа иазҧхьагәаҭаны иамоу аусқәа ртәы далацәажәеит.

Аҟәа. Нанҳәамза 17. Аҧсныпресс. Ирена Џьопуаҧҳа. Аҧсны аҧыза-министр ихаҭыҧуаҩ, атәыла аҩныҵҟатәи аусқәа рминистр Аслан Кәабахьиа атәыла аҩныҵҟатәи аусқәа Рминистрра хаҭалатәи аилазаара идгалара анымҩаҧыс ашьҭахь, ажурналистцәа рзы имҩаҧигаз абрифинг аҿы, наҧхгара зиҭо ахылаҧшырҭа иазҧхьагәаҭаны иамоу аусқәа ртәы далацәажәеит.

Аминистр, атәылаҿы акыр иауадаҩу акриминагентә ҭагылазаашьа шышьақәгылоу азгәеиҭеит.

“Иҟоу аҭагылазаашьа, Аҳәынҭқарра Ахада раҧхьа днаргыланы, аӡәгьы идикылартә иҟам. Иахьа, Аҳәынҭқарра Ахада Рауль Ҳаџьымба атәыла аҩныҵҟатәи аусқәа Рминистрра ҧхьаҟатәи аусура атәы иаазыркьаҿны дрылацәажәеит. Уи анаркотикатә маҭәашьарқәа здызкылои урҭ рыларҵәара мҩаҧызгои ртәы ус баша дрыламцәажәаӡеит. Иарбоу ацәгьара ҳҳәынҭқарра ашьақәгылара ҵнаршәаауеит, аҿар ықәнагоит. Сара сганахьала, азинхьчаратә усбарҭақәа анаркотикатә маҭәашьарқәа рыларҵәара иаҿу ацәгьоуцәа ҕәҕәала ишырҿагыло азы ҭакҧхықәрала аҳәамҭа ҟасҵоит. Ҳара атәыла ашәарҭадара амаҵзуреи апрокуратуреи, егьырҭ амчратә структурақәеи русеицурала анаркоманиа ҕәҕәала ҳаҿагылароуп. Уи адагьы ҧсыхәа ыҟаны избом. Избан акәзар, анаркотикатә маҭәашьарқәа рыдкылареи рыларҵәареи, арҳәрақәеи ақәыларақәеи, ауаа рҧаареи, уҳәа еиуеиҧшым ацәгьоурақәа рыдҳәалоуп”, – ҳәа инаҵшьны иазгәеиҭеит атәыла аҩныҵҟатәи аусқәа рминистр Аслан Кәабахьиа.

Иара убас, Аслан Кәабахьа ажурналистцәа рызҵаарақәа рҭак ҟаиҵеит. Убас, ажурналистцәа рашәарамза 5 аҽны атәыла аҩныҵҟатәи аусқәа Рминистрра ахыбра аҧхьа иҟалаз аилаҩеиласра аилыргара амҩаҧысшьазы ахшыҩзышьҭра аадырҧшит.

"Ари аус аилыргара апрокуратура аҿы имҩаҧысуеит. Иарбанызаалак атәыла аҿы аҭыҧ зауа ацәгьоура хымҧада аилыргара ахәҭоуп. Атәыла аҩныҵҟатәи аусқәа Рминистрра– ари системоуп. Убри аҟнытә, урҭ ацәгьоура хымҧада еилыргатәуп. Иара убас, аструктуратә еиҭакрақәа рыҟаларазы ажурналистцәа рҭак ҟаҵо, Аслан Кәабахьиа “Хымҧада иҟалоит!” ҳәа иҳәеит.

Иара убас аминистр атәыла аҩныҵҟатәи аусқәа Рминистрра иадҳәалоу азакәан далацәажәо, уи ҩажәа шықәса шахыҵхьоу, насгьы иҟоу аҭагылазаашьазы уи шажәхьоу, аиҭакрақәа ралагалара шхымҧадатәиу азгәеиҭеит.

Иара убас, Аслан Кәабахьиа азакәан иақәныҟәо ауааҧсыра рыбжьара аилыркааратә цәажәарақәа рымҩаҧгара иаҵоу аҵакы хада далацәажәеит: “Ауаҩы иахәҭам аҭыҧ аҿы имашьына иргылазар, уи агәҽанызаара иҭатәуп. Иаразнак ахараҧса иршәара аҭахӡам. Ажәлар есымша рхьырхәра ацвынхәрас, ҭынч рацәажәара аҭахуп. Ахьырхәра зыхәҭоу ауаагьы жәаҳәарада иҟоуп. Атәылаҿы аҭагылазаашьа зыруадаҩуа, ажәлар рыҧсҭазаара аҭышәынтәалара иаҧырхагоу џьоукы-џьоукы роуп ахьырхәра ҕәҕәа зҭаху”.

Ахыркәшамҭаз аминистр, амассатә информациа ахархәагақәа рхаҭарнакцәа аус рыцура есымша дшазхиазаауа, насгьы атәыла аҩныҵҟатәи аусқәа Рминистрра аусуразы адыррақәа ажәлар рыларҵәара шалыршахо азгәеиҭеит: “ҳара амассатә информациа ахархәагақәа рыла ҧымкрада ауааҧсыра ҳаҽрымаҳдалоит, иҳалшазгьы, макьаназы иҳалымшаци ртәы иаартны ҳалацәажәалоит”.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа