Ажәабжьқәа

Популярное

Аслан Аҩӡба: Ҭоурыхла уахәаҧшуазар, Аҧсны ахьыҧшымра азы Адекларациа аҵакы дуӡӡоуп, уи аҧсуаа рхақәиҭра азықәҧара аҩаӡара ашьҭыхра даара иацхрааит

795
25.08.2015 12:13
Аслан Аҩӡба: Ҭоурыхла уахәаҧшуазар, Аҧсны ахьыҧшымра азы Адекларациа аҵакы дуӡӡоуп, уи аҧсуаа рхақәиҭра азықәҧара аҩаӡара ашьҭыхра даара иацхрааит
Август 25 1990 шықәсазы Иреиҳаӡоу Асовет асессиа аҿы Аԥснытәи Асоветтә Асоциалисттә Республика аҳәынҭқарратә суверенитет азы Адекларациа рыдыркылеит. 

Аҟәа. Август 25. Аԥсныпресс. “Адекларациа адкылара аус баша иҟамлеит, усҟантәи аамҭазы иҟаз аҭагылазаашьа иарҿиаз документуп. Ҳазлацәажәо аамҭа, 1990 шықәсазы Аҧсни Қырҭтәылеи реизыҟазаашьа еиҳагьы иуадаҩхеит. Избан акәзар, Аԥсни Қырҭтәылеи злаз Асоветтә Ҳәынҭқарра ду аилаҳара иаҿын. Убри инаҿырԥшны, Аԥсны ахеиқәырхара иашьҭалар акәын, аха усҟан уи иформалтәым аорганизациақәа рыла иузыҟаҵомызт. Аԥсны Ахәынҭқарра аԥсуаа рнапахьы иаагатәын”, – иҳәеит аҭоурыхтә ҭҵаарадыррақәа ркандидат Аслан Аҩӡба. 

Уи иажәақәа рыла, Аԥсны Аҳәынҭқарратә усбарҭақәа ҳтәыла зыхьчо азакәанқәа хымԥада иаԥырҵар акәын. “Зыӡбахә ҳамоу аусшәҟәы, кыраамҭа иаҿырԥшны аԥсуаа реиқәырхара иазкыз раԥхьаӡатәизар ҟалап, избан акәзар уаанӡа Иреиҳаӡоу Асоветгьы, Аԥсны аиҳабыра зегьи ақырҭҵәа ирмазҵааӡакәа акгьы рызрыдкылаӡомызт”. 

“Ҳазлацәажәо Адекларациа адагьы август 25 рзы Иреиҳаӡоу Асовет Аԥснытәи Асоветтә Асоциалисттә Республика аҳәынҭқарратә хақәиҭра агарантиақәа захьӡыз Ақәҵара рыдыркылеит. Абарҭ аҩ-усшәҟәгьы рҵакы дуӡӡоуп. Урҭ рыҩбагьы Иреиҳаӡоу Асовет иаднакылон, уи аамҭа азы ҳажәлар ирҭахыз адагьы ақырҭцәа ргәаанагара ахшыҩзышьҭра арҭон. Усҟан Аԥсны 40 % ақырҭцәа нхон”, – иҳәеит Аслан Аҩӡба. 

Аҭоурыхтә ҭҵаарадыррақәа ркандидат ишазгәеиҭаз ала, Адекларациа адкылара акыр аамҭа аҽазыҟаҵара иаҿын. Ақырҭцәеи урҭ рыдгылаҩцәеи хынтә асессиа хдырбгалеит. Амшхәаԥштә азҵаарақәа анраҳа, аизарахь имнеиӡеит. Акворум захьӡу аилкаара ала Асовет алахәылацәа бжеиҳараҩык ыҟазароуп, убри инамаданы, аизара ҩынтә ирзымҩаԥымгаӡеит. Арегламент ала знык-ҩынтә имааир ҟалоит, ахԥатәи аан иааиз рхыԥхьаӡара ала имҩаԥыргоит асессиа, амала уа ирыдыркыло азакәанқәа иконституциатәымзар ауп. Адекларациеи Ақәҵареи алахәылацәа реиҳараҩык рыла иудыукылар ҟалоит. 

“Абас ала, август 25, 1990 ш. имҩаԥыргеит аусшәҟәқәа рыдкылара азы асессиа. Амшхәаԥштә хызҵаарак рыла ишьақәгылан: 
1. Аекономика иадҳәалан, 
2. Аԥснытәи Асоветтә Асоциалисттә Республика аҳәынҭқарратә хақәиҭра агарантиақәа рзы Ақәҵара. 
3. Аԥснытәи Асоветтә Асоциалисттә Республика аҳәынҭқарратә суверенитет азы Адекларациа. 

Даҽа зҵааракгьы ықәгылан – Аԥсны Аҳәынҭқарра Аконституциа аԥсахрақәа алагалара. Аха аԥхьа ишаҳҳәаз еиԥш, Иреиҳаӡоу Асовет алахәылаҩцәа 75 % ыҟамкәа ари аусшәҟәы адкылара ауам”, – иҳәеит Аслан Аҩӡба. 

Аҭоурыхдырҩы “Аԥсныпресс” акорреспондент ишизеиҭаиҳәаз ала, Қырҭтәыла анаҧхгарахь Звиад Гамсахурдиа данааи, Асоветтә аамҭазы ирыдыркылаз азакәанқәа амч рымамкәа иҟарҵеит. Аԥсни Қырҭтәылеи злеидҳәалаз абарҭ Асоветтә Еидгыла азакәанқәа рыла ауп. Қырҭтәыла урҭ мап анрыцәнакы, Аԥсни иареи реидҳәалара азиндырратә база ыӡит. Аԥсны уажәшьҭа иавтономиамызт, Асоветтә Социалисттә Республикоуп ҳәа рыларҳәартә еиԥш, аԥсуаа Аԥсны Аҳәынҭқарра ахақәиҭра азы агарантиа Ақәҵара рыдыркылеит. Адекларациеи Ақәҵареи ҵакыла еидҳәалоуп. 

“Усҟантәи аамҭазы аиҿагыларақәа рацәан, изыхҟьозгьы аԥсуа жәлар рхыхьчара даҽа ҩаӡарак ахь ашьҭыхра акәын. Аԥсуа Ҳәынҭқарра амч ала аԥсуаа хьчатәын. Иҟаз аҭагылазаашьа уи аҩыза алшара шунамҭозгьы, дара ирылшеит ас еиԥш Ақәҵареи Адекларациеи рыдкылара. Адекларациагьы Ақәҵара инақәыршәаны ауп ишрыдыркылаз. Уи иаҳәон: Аԥсны адгьылҵакыра аҿы аус зуа аԥсуа закәанқәа роуп, Аԥсны зхы иақәиҭу тәылоуп, уи имҩаԥнаго аусқәа зегьы ахала иаӡбоит. Убри ауп хықәкыс иамаз. Ҭоурыхла уахәаԥшуазар, Аԥсны ахьыԥшымра азы Адекларациа аҵакы дуӡӡоуп, аԥсуаа рхақәиҭра азықәԥара аҩаӡара ашьҭыхра даара иацхрааит”, – иҳәеит аиҿцәажәара хыркәшо Аслан Аҩӡба.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа