Ажәабжьқәа

Популярное

Апаркқәа, адәқәа рҭеиҭыҧш арҽеира, алифтқәа ирыдҳәалоу апроблемақәа рыӡбара: Кан Кәарҷиа Аҳабла Ҿыц даҭааит

123
08.11.2019 19:57
Апаркқәа, адәқәа рҭеиҭыҧш арҽеира, алифтқәа ирыдҳәалоу апроблемақәа рыӡбара: Кан Кәарҷиа Аҳабла Ҿыц даҭааит
Аҳҭнықалақь ахада инапынҵақәа назыгӡо Кан Кәарҷиа Аҟәа ақалақь аҿы аинспекциақәа рымҩаҧгара ирыцеиҵоит.

Аҟәа. Абҵарамза 8. Аҧсныпресс. Дамеи Касланӡиа. Аҟәа ақалақь ахада инапынҵақәа назыгӡо Кан Кәарҷиа иусуратә ныҟәара Аҳабла Ҿыц аҭаарала ихиркәшеит.



Кан Кәарҷиа ишазгәеиҭаз ала, Аҳабла Ҿыц аҿы иҟоу апроблемақәа, аҳҭнықалақь егьырҭ араионқәа жәпакы рҿы иҟоу ауадаҩрақәа иреиҧшуп – апаркқәеи аҩнеихагылақәа ирыҵанакуа адәқәеи анапы рыгуп: “Апаркқәа рҿы еиҭаҳау аҵиаақәа ирхылаҧшыша алкаатәуп. Аҵлақәа еилыхлатәуп, араҟа ахәыҷқәа хәмаруеит, ихжәаз амахәҭақәа  рықәҳаргьы алшоит. Уи иузудымкыло ҭагылазаашьаны иҟоуп!”

Кан Кәарҷиа амикрораион агәҭаҵәҟьа, иажәыз, игәыгәҭажьны игылоу ахәмарратә автодром гәеиҭеит: “Исзеилкаауам ас еиҧш аобект аргыларазы азин аҭара шҧалыршахеи?! Уи хымҧада иқәгатәуп. Араҟа ауааҧсыра рыҧсы ахьыршьаша апарктә зона иацҵахоит”.



Убри аан, ақалақь архитектор хада Светлана Шаменкова адырра ҟалҵеит: “Автодром 2015 шықәса рзы иргылан. Уажәы уи аус ауӡом, ҳусзуҩцәа иацы арахь иааны, аобиект зтәу далархәны аобиект аҭагылазаашьазы акт ҟарҵеит. Амхра азы азҵаара адгьылхархәаразы Акомиссиа аҿы иқәыргыланы аобиект ықәгатәуп”.



Убасҵәҟьа, Кан Кәарҷиа аҩнеихагылақәа рҿы алифтқәа ирыдҳәаланы иҟоу апроблемақәа дырзааҭгылеит. Ахәҭакахьала, Зҭакҧхықәра Ҳәаақәҵоу Аилазаара “Аҧснылифт” адиректор Ҭемыр Ҷкотуа адырра ҟаиҵеит: “Иҟоуп аҩнқәа зынӡа алифтқәа ахьыҟам. Аҳабла Ҿыц ауаа рацәа реиланхарҭоуп. Убри аҟнытә араҟа зегьы раасҭа алифтқәа аҭахуп. Иааизакны иуҳәозар, ақалақь аҿы иҟоуп 450 лифт, урҭ рахьынтә 280 заҵәык роуп аус зуа, иазгәаҭатәуп урҭ рахьынтә 60 шықәса инеиҧынкыланы аус зухьогьы шыҟоу.  Уи даара ишәарҭоуп”.



Аҳҭнықалақь ахада инапынҵақәа назыгӡо иара убас амашәыр зхылҿиаар зылшо аҩнеихагыла даҭааны игәеиҭеит. Уи иҟоу апроблемақәа алкааны зыҧшрак ҟамҵақәа рыӡбара анапы аркразы адҵа ҟаиҵеит.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа