Ажәабжьқәа

Популярное

Џьансеҭ Казанҧҳа: Шьамтəылеи Аҧсни рыбжьара аимадара есааира иҕәҕәахалоит ҳәа ҳгәы иаанагоит

111
02.07.2019 12:29
Џьансеҭ Казанҧҳа: Шьамтəылеи Аҧсни рыбжьара аимадара есааира иҕәҕәахалоит ҳәа ҳгәы иаанагоит
Аҧсны Аҳәынҭқарра Ахада Рауль Ҳаџьымба Шьамтәылатәи Арабтә Ареспублика Апарламент адепутат Џьансеҭ Казанҧҳа дидикылеит.

Аҟәа. Ҧхынгәымза 2. Аҧсныпресс. Аҧсны Аҳəынҭқарра Ахада Рауль Ҳаџьымба Шьамтəылатəи Арабтə Республика Апарламент адепутат, Шьамтəыла аибашьраҿы иҭахаз ргəалашəара ахьӡала иаҧҵоу Агəыҳалалратə фонд анапхгаҩы, аинрал Уалид Маршьан иҧшəмаҧҳəыс Џьансеҭ Казанҧҳа дидикылеит.

Аҳəынҭқарра Ахада Џьансеҭ Казанҧҳа аҧсшəа леиҳəеит:

“Ҳарҭ даара ҳаигəырҕьоит Аҧсныҟа шəаара. Гəыблыла иаҳгəалаҳаршəоит Шьамтəылатəи ҳаиҧыларақəа. Шəареи ҳареи ҳаиҧылара, шəҭаацəеи ҳареи ҳаиқəшəара – даара хҭыс дуун. Ҳгəы шəыладууп, ибзианы иаҳдыруеит Апарламент аҟны имҩаҧыжəго аусура. Ҳара иаҳбарҭан шəколлегацəа шышəзыҟаз.

Иҭабуп ҳәа расҳәоит даҽазныкгьы Шьамтəылатəи анапхгара агәаҕьра аарҧшны ирыдыркылаз аӡбамҭазы. Ас еиҧш шəасҳəоит Аҧсни Шьамтəылеи реизыҟазаашьақәа рырҭбаара аганахьала аусура ду мҩаҧызго азакəанҧҵаратə мчра шəахьаҭарнаку аҳасабала.Ҳара агəра ҳгоит, Шьамтəыла ажəлар ақәҧара иаҵамхакәа, атəыла аекономика аиҭашьақəыргылара шрылшо”.

Џьансеҭ Казанҧҳа Ахада иҭабуп ҳəа иалҳəеит:

“Шəача ақалақь аҟны аусура аганахьала сыҟан аҟнытә, Аҧсныҟа смаар сгəы иамуит. Сара аара сылымшеит Уалид Маршьан ибаҟа аартрахь, иахьа исҭахуп дахьышәгəалашəыршәо азы иҭабуп ҳəа шəасҳəарц. Уалид Маршьан иҧшəмаҧҳəыс лаҳасабала, Шьамтəылатəи Апарламент адепутат лаҳасабала, ажәа шәысҭоит еснагь аус шəыцура ҳшазхиоу, ҳашшəыдгыло. Шьамтəылеи Аҧсни рыбжьара аимадара есааира иҕәҕәахалоит ҳәа ҳгәы иаанагоит. Сара ҩ-ҧсадгьылк сымоуп, Шьамтəылеи Аҧсни, убри аҟнытә, изласылшо ала, Аҧсынгьы Шьамтәылагьы сацхраалоит. Шəара ҳара ҳахь шəнеира ҳара ҳзы насыҧ дуун. Сара исымоуп амаҭацəа, урҭ Аҧсныҟа ихынҳəырц сҭахуп”.

Аџьынџьуаа рҭоурыхтә ҧсадгьыл ахь рырхынҳәразы аминистр Беслан Дбар иазгəеиҭеит Џьансеҭ Казанҧҳа Аҧсныҟа лаареи егьырҭ атəылақəа рҟынтə ҧсшьара иааны иҟоу ҳџьынџьуаа рхəыҷқəа раареи шеиқəшəаз: “Џьансеҭ Казанҧҳа Аҧсныҟа лаара заҳаз ауаа хыҧхьаӡара рацəала еизеит аминистрра ахыбраҿы. Аҭел еихсыҕьуамызт. Иара убас, узеигəырҕьаша хҭысуп зыҧсшьарамшқəа зыҧсадгьыл аҿы изхызго ҳџьынџьуаа рхəыҷкəа раареи лара лаареи ахьеиқəшəаз. 80-ҩык ахəыҷқəа Аҧсны иҟоуп. Урҭ Аҧсны аҧшӡарақəа, акультура, абзазара уҳәа дҳарбараны ҳаҟоуп”.

Аиҧылараҟны имҩаҧысит Џьансеҭ Казанҧҳа аҳәынҭқарратә ҳамҭа ланашьара ацеремониа. Аусҧҟа атекст инақəыршəаны, Аҧсны Аҳəынҭқарреи Шьамтəылатəи Арабтə Республикеи реимадара арҕəҕəаразы, иара убас Аҧсны Аҳəынҭқарра адəныҟатəи аусқәа рыӡбараҟны ллагаламҭазы Џьансеҭ Казанҧҳа иланашьоуп “Ахьӡ-Аҧша” аорден ахҧатəи аҩаӡара.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа