Ажәабжьқәа

Популярное

Амҩатә фонд ахашәалахәы ала абиуџьеттә уснагӡатә 12-14 миллион мааҭ рыла изынагӡахом

463
16.10.2015 10:15
 Амҩатә фонд  ахашәалахәы  ала абиуџьеттә  уснагӡатә 12-14 миллион мааҭ  рыла изынагӡахом
Ас еиҧш азҧхьагәаҭа ииасыз жәымз рыбжьара Афонд иҭанагалаз аҧара азгәаҭарақәа рыла ишьаҭаркуп

Аҟәа. Октиабр 16. Аҧсныпресс. Дырмит Басариа. Аҧсны Амҩатә фонд анаҧхгаҩы ихаҭыҧуаҩ Витали Ҵәыџьба иажәақәа рыла, абиуџьет ауснагӡатә 55 млн. мааҭ рҟынӡа инаӡо аҟалара азҧхьагәаҭан. Аха, ииасыз жәымз рыбжьара Афонд иҭанагалаз аҧара азгәаҭарақәа рыла, абиуџьеттә уснагӡатә 12-14 миллион мааҭ рыла ишзынамыгӡахоз еилкаахеит. 

“Урыстәыла Афедерациа абылтәи ахьшьтәи рыхәҧса ахалара ахьыҟалаз иахҟьаны, зыӡбахә ҳамоу аалыҵ цыралеи еизакны аҭиреи рыхәҧсақәа ирыбжьоу аивыгара аҟынтәи ашәахтә алхра аҳасабала Амҩатә фонд ахь иҭанагалоз 5% акырӡа еиҵахеит. Убри ауп еиҳарак иаалырҟьаны иҟалаз ауснагӡатә рбагақәа рыҵахара зыхҟьаз”, - ҳәа “Аҧсныпресс” акорреспондент диҿцәажәо аҳәамҭа ҟаиҵеит Витали Ҵәыџьба. 

Убри аан Аҧсны Амҩатә фонд анаҧхгаҩы ихаҭыҧуаҩ ишазгәеиҭаз ала, иҳаҩсыз жәымз рыла аиҭашьақәыргыларатә усурақәа рынагӡара азы 34 млн. 705 нызықь мааҭи азоужьын. Ареспублика амҩадуқәа рзы иныхуп 23 млн. 416 нызықь мааҭи. Афонд ахарџь ала Аҳәынҭқарратә Еилакы “Аҧсны Амҩаргылара” хықәкылатәи ахархәаразы иҷыдоу атехникеи автомашьынақәеи аахәан. Ареспубликатә мҩадуқәа иахьрыҵанакуа аҭыҧқәа зегьы рҿы еихшаны аҭакҧхықәра зду аусуратә бригадақәа хәба аҧҵоуп. Амҩатә инфраструктура аиқәыршәара (аҭыҧрбагақәа, амҩатә дыргақәа, уҳәа убас ирацәаны) азы иазоужьыз аҧара 3 млн. 800 нызықь мааҭи рҟынӡа инаӡоит. Витали Ҵәыџьба амҩаду Очамчыра-Ҭҟәарчал ахырхарҭа ала, ақыҭа Гәыҧ иалсны ицо аӡиас Џьақәлар ацҳа ҿыц ахҵара атәы ҷыдала инаҵшьны иазгәеиҭеит. 

Иара убас, араионқәа рхадарақәа рыцырхырааны аҭыҧантәи амҩақәагьы реиҭашьақәыргыларатә усурақәа афинансқәа рзоушьҭра мҩаҧысуеит. Иҳаҩсыз жәымз ирылагӡаны, Ешыра, Мыркәыла, Агәыбедиа, Гәыҧ, Аџьамҧазра уҳәа ақыҭақәа рҿы анышәаҧшьи аҧслымӡи злоу амҩақәа еиҭарҿыцуп. Иааидкыланы уи 11 млн. 269 нызықь мааҭи рықәырӡын.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа