Ажәабжьқәа

Алашарбагеи Ҭҳәыбын аҳаблеи еимыздо еиҭашьақәыргылоу ацәаҳәа ала раҧхьатәи атроллеибус дәықәҵахеит

550
14.08.2017 14:59
Алашарбагеи Ҭҳәыбын аҳаблеи еимыздо еиҭашьақәыргылоу ацәаҳәа ала раҧхьатәи атроллеибус дәықәҵахеит
Атроллеибустә цәаҳәа аартра ацеремониа аҟәатәи аџьармыкьа азааигәара иҟоу аангыларҭа аҿы имҩаҧысит.

Аҟәа. Нанҳәамза 14. Аҧсныпресс. Дырмит Басариа. Раҧхьатәи атроллеибус аангыларҭа “Аџьармыкьа” аҟынтәи Алашарбагеи Ҭҳәыбын аҳаблеи еимыздо еиҭашьақәыргылаз атроллеибустә цәаҳәа ала идәықәҵахеит.  Ацәаҳәа аартра ацеремониа рхы аладырхәит Аҟәа ақалақь ахада Адгәыр Ҳаразиеи Амуниципалтә Унитартә Наплакы “Аҟәа ақалақь Ахадара атроллеибустә Усбарҭа” анаҧхгаҩы Иури Барганџьиеи.

Аҧсныпресс акорреспондент диҿцәажәо Иури Барганџьиа ишазгәеиҭаз ала: “2012 шықәса инаркны Алашарбагеи Ҭҳәыбын аҳаблеи еимыздо ацәаҳәа (Имам Шамиль имҩаду инаркны абжьаратәи ашкол №12 аҟынӡа) иҟалаз амшцәгьақәа ирыхҟьаны аусура аанкылан. 2015 шықәса рзы аҳәынҭқарра абиуџьет аҟынтәи иарбоу атроллеибустә цәаҳәа аиҭашьақәыргыларазы аҧаратә хархәагақәа азоужьын. Иахьатәи амш азы аиҭашьақәыргыларатә усурақәа зегьы 100% рыла ихыркәшоуп, аангыларҭа “Аџьармыкьа” аҟынтәи идәықәлеит раҧхьатәи атроллеибус”.

Иара убас, аҟәатәи атроллеибустә Усбарҭа анаҧхгаҩы амаршрут иҿыцны иалагалаз дахцәажәеит: Уаанӡа амаршрут ҩбаны еихшазҭгьы, Ҭҳәыбын-Аџьармыкьа аҟынӡеи Аџьармыкьа аҟынтәи абжьаратәи ашкол №12 аҟынӡеи, уажәы, уи амаршрут еидкылоуп, Алашарбага аҳабла аҟынтәи Ҭҳәыбын аҳабланӡа инаӡоит. Уи ала 18-минуҭ рыбжьаҵаны иныҟәалоит 5 троллеибуск”.

Ахәҭакахьала, аҳҭнықалақь ахада Адгәыр Ҳаразиа инаҵшьны иазгәеиҭеит: “Ари ахҭыс дууп ақалақь азы, избан акәзар аиланхарҭақәа рҿы инхо ауааҧсыра рыҧсҭазаара акыр иарманшәалоит. Жәаҳәарада, атроллеибустә парк дотациала ишьақәгыло усбарҭаны иахьыҟоу инамаданы, ари акциа ақалақь азы феида ду анаҭо иҟам. Аха ҳара ақалақь ауааҧсыра ари зыхәҧса лаҟәу атранспорт ада рааныжьра азин ҳаманы иҳаҧхьаӡаӡом, избан акәзар Аҟәаа зегьы ирылшом есыҽны автобусла, мамзаргьы амаршруткақәа рыла анеиааира”.

Адгәыр Ҳаразиа иажәақәа рыла, Алашарбагеи Ҭҳәыбын аҳаблеи еимыздо атроллеибустә цәаҳәа амаҵзура азы аҳҭнықалақь абиуџьет аҟынтәи есышықәса миллион мааҭ инареиҳаны иазоужьхалоит.

Алашарбагеи Ҭҳәыбын аҳаблеи еимыздо еиҭашьақәыргылоу атроллеибустә цәаҳәа 25 километр рҟынӡа инаӡоит. Атроллеибус амаршрут анагӡара 1,5 ирҭагӡахоит.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа