Ажәабжьқәа

Популярное

Акциа “Афырхацәа рымҩала” аҳәаақәа ирҭагӡаны Дамхәырц аҩхаа ахь ахалара хыркәшан

496
17.08.2015 15:19
Акциа “Афырхацәа рымҩала” аҳәаақәа ирҭагӡаны Дамхәырц аҩхаа ахь ахалара хыркәшан
Абри амҩа ала 23 шықәса раԥхьа аԥсуа жәлар ацхыраара рыҭара азы Нхыҵ-Кавказнтәи хатәгәаԥхарала еибашьара иаауан ҳашьцәа. 

Аҟәа. Август 17. Аԥсныпресс. Дамхәырц аҩхаа – Аԥсны шьхатәыла иаҵанакуа Кавказтәи ашьхеибаркыра хада иалсуа аҩхаақәа 14 ируакуп. Урҭ рыҳаракыра амшын аҩаӡара ахыхь 2300 инаркны 3000 метра рҟынӡа инаӡоит. Урҭ реиҳарак рҟынӡа анаӡара уадаҩуп. Абри амҩа ала 23 шықәса раԥхьа аԥсуа жәлар ацхыраара рыҭара азы Нхыҵ-Кавказнтәи хатәгәаԥхарала еибашьара иаауан ҳашьцәа. Уаҵәҟьа ауп Аџьынџьтәылатәи еибашьра Дуӡӡа аан иҭахаз аибашьцәеи Аԥсны Аџьынџьтәылатәи еибашьра аан аԥсуа жәлар ирывагыланы хатәгәаԥхарала ақырҭуа мпыҵахалаҩцәа иреибашьуаз Нхыҵ-Кавказтәи аруааи рбаҟақәа ахьышьақәыргылоу. 

Дамхәырц аҩхаа азааигәара Аԥсни Урыстәылеи рҳәынҭқарратә ҳәаа ииасуеит. 

Ауадҳара аҟынтәи Дамхәырц адҳәыԥшра аҟынӡа ацара 5 сааҭқ уадхалоит. Апроект “Афырхацәа рымҩала” аҳәаақәа ирҭагӡаны (аиҿкааҩ – аҿар рполитика азы Аҳәынҭқарратә еилакы), 30-ҩык арԥарцәеи аҭыԥҳацәеи, хатәгәаԥхарала еибашьра иааз аибашьцәа ҳаҭырқәҵарала ргәаларшәара азы иарбоу аҭыԥ аҟынӡа инаӡеит. 

“Ари ҳфырхацәа ргәалашәара азы иҳалҳаршаша имаҷу аҳәҭа ауп. Аҭынч аамҭа азы абри амҩа анысра ауадаҩреи ашәарҭареи ацӡам, аха ҳҭоурых иаҳа иааигәаны анырра, Аԥсны ахақәиҭреи ахьыԥшымреи рзы зхы иамеигӡаз ҳгәалаҳаршәарц аҭагылазаашьа ҳамоуп”, – ҳәа иҳәеит апроект алахәылаҩцәа руаӡәк. 

“Ҳҿар изнысыз амҩа мариамызт, аха уи акәӡам ихадароу, аус злоу, ари дара рзы баша ныҟәарамызт, урҭ ирдыруеит уи зызкыз, ҳфырхацәа иаадырԥшыз агәымшәара еилыркаауеит”, – ҳәа инаҵшьны иазгәеиҭеит аҿар рполитика азы Аҳәынҭқарратә еилакы ахантәаҩы Алиас Аҩӡба.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа