Ажәабжьқәа

Популярное

Аконкурс "Гранд- Премиум" аҿы ансамбль "Афырҭын" аҧхьахә хада анашьахеит

272
26.12.2016 15:39
Аконкурс "Гранд- Премиум" аҿы  ансамбль "Афырҭын" аҧхьахә хада анашьахеит
Жәларбжьаратәи афестиваль-аконкурс Гранд-Премиум аихшьаалақәа рыла, Гагратәи ахореографиатә ансамбль “Афырҭын” аҧхьахә хада — Гран-При анашьахеит.

Аҟәа. Ҧхынҷкәын 26. Аҧсныпресс. Аҧсны зҽаҧсазтәыз артист Лев Қьецба наҧхгара зиҭо Гагратәи ахореографиатә ансамбль “Афырҭын” аиҵбыратә гәыҧ Урыстәыла аҩадатәи аҳҭныҟалақь ҳәа изышьҭоу, ақалақь Санкт-Петербург имҩаҧысуаз Жәларбжьаратәи афестиваль-аконкурс Гранд-Премиум ахы аланархәит. Убри аан, Гагра араион Ахадара апресс-маҵзура излаанацҳауа ала, аҧсуа кәашаҩцәа адунеи атәылақәа жәпакы рҟынтәи иреиҕьӡоу арҿиаратә коллективқәа ирыцлаблар акәхеит.

Гагратәи ахореографиатә ансамбль “Афырҭын” аиҵбыратә гәыҧ иҳаҩсыз ашықәс азы Шәача ақалақь аҿы имҩаҧысуаз аконкурс “Ажәлар рхыҵхырҭақәа” аҧхьахә хада аиура алнаршеит. Убри иабзоураны, ансамбль акәашаҩ ҿарацәа ҩаҧхьа афестиваль алахәхаразы ааҧхьара роуит. Акәашаҩ ҿарацәа афестиваль аартраҿы акәашара “Аурашьа” ала иқәгылеит. Аконкурс актәи атур аҿы аӡбаҩцәа ирыдгалан аварцәа рыкәашара. Аҩбатәи атур аҿы –бзыҧаа рыкәашара.

Аконкурс аихшьаалақәа рыла Гагратәи ахореографиатә ансамбль “Афырҭын” аҧхьахә хада — Гран-При анашьахеит.

Рыҧсадгьыл ахь ианыхынҳәуаз аҳәынҭқарратә ҳәаа аҿы ахәыҷқәа рҭаацәеи рҩызцәеи рҧылеит. Ара ансамбль артистцәа импровизациа ҳасабла ақәгылара еиҿыркааит. Акәашаҩ ҿарацәа Санкт-Петербург ирбаз-ираҳаз атәы еиҭарҳәеит.

Ансамбль “Афырҭын” алахәылацәеи анаҧхгаҩи Гагра араион ахада иҟаиҵаз афинанстә цхыраара азы ҭабуп ҳәа иарҳәоит.

“Есышықәса ақалақь Санкт-Петербург имҩаҧысуа жәларбжьаратәи афестиваль-аконкурс иреиҕьу ансамбльқәа рхы аладырхәуеит. Ари афестиваль аиҿкааҩцәа шықәсык иалагӡаны Урыстәылеи уи анҭыҵгьы аконкурсқәа мҩаҧыргоит. Аконкурсқәа реихшьаалақәа рыла аҧхьахәтә ҭыҧқәа аанызкылаз ансамбльқәа ашықәс анҵәамҭазы Санкт-Петербург ақалақь аҿы ақәгыларазы алшара роуеит. Сынтәа ҳара аконкурс “Территория талантов” аҿы гран-при агара ҳалшеит, убри инамаданы, Санкт-Петербур ақалақь аҿы имҩаҧысраны иҟаз афестиваль ахь ааҧхьара ҳауит. Иқәгылоз 80 ансамбль рыбжьара ҳара агран-при аиура ҳалшеит”, – ҳәа иҳәеит ансамбль анаҧхгаҩы, Аҧсны зҽаҧсазтәыз артист Лев Қьецба.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа