Ажәабжьқәа

Ахра Арсҭаа: акырӡа иҳадоу азҵаарақәа рыӡбаразы ҳҳәынҭқарра иахәҭоу акадртә лшарақәа амоуп

1011
19.04.2018 14:22
Ахра Арсҭаа: акырӡа иҳадоу азҵаарақәа рыӡбаразы ҳҳәынҭқарра иахәҭоу акадртә лшарақәа амоуп
Аполитикатә партиа “Аҧсны” ахантәаҩы Ахра Арсҭаа атәыла аҿиара азы ихадоу ауснагӡатәқәа дрылацәажәеит.

Аҟәа. Мшаҧымза 19. Аҧсныпресс. Аполитикатә партиа “Аҧсны” аизара Ду аҿы аполитикатә партиа ахантәаҩы Ахра Арсҭаа атәыла аҿиара азы ихадоу ауснагӡатәқәа дрылацәажәеит. 

Ахра Арсҭаа иҿыцу аҵарадырра асистема аҧҵара ахымҧадатәра ҷыдала дазааҭгылеит: “Иреиҳаӡоу ашкол ҳҳәынҭқарра аҿиара азы ихымҧадатәиу, ҳаамҭа иақәшәо акадрқәа рыла аиқәыршәара алшоит. Ҳара Аҧснытәи аҳәынҭқарратә Университет аректор, академик Алеко Гәарамиа аҵарадырреи аҭҵаареи амилаҭтә политика ихадоу хәҭаны иҟалароуп ҳәа имоу агәаанагра, жәаҳәарада инагӡаны ҳадгылоит. Аҵарадырреи аҭҵаареи ирыбзоураны ауп Владислав Арӡынба, Нестор Лакоба, Ефрем Ешба, Николаи Акьыртаа, Константин Шьаҟрыл, Гьаргь Ӡиӡариа, Фазиль Искандер, Баграт Шьынқәба, уҳәа реиҧш иҟоу ажәлар ирылцыз иналукааша ҳполитикцәа, ҳҵарауаа, ҳашәҟәыҩҩцәа рышьақәгылара шыҟалаз”.

Ахра Арсҭаа игәаанагарала, атәыла аизҳазыҕьара даҽа ганкны иҟоуп атехнологиақәа рыҿиара: “Ҳаҧсҭазааратә ҭагылазаашьа ҳакәша-мыкәша иҟоу аҳәынҭқаррақәа ирымоу атехнологиатә ҿиара азааигәахара, анаҧхгараҭаратә, арратә, аҵарадырратә, аҭҵааратә, акультуратә, уҳәа аусхкқәа иҿыцу, ҳаамҭа иақәшәо атехнологиақәа ралагалареи, иара убас, ақыҭақәа рҿы инхо анхацәа рыҧсҭазаара арманшәалареи, аҧсуа культуреи абызшәеи рхәышҭаара аҳасабала ақыҭа аиқәырхареи ҳаднаҵоит”. 

Иара убас, Ахра Арсҭаа инаҵшьны иазгәеиҭеит: “Ҳара ҳахшыҩи, ҳамчи, ҳфинанстә лшарақәеи ааидкыланы адунеи зегьы илаҧсоу ҳџьынџуаа рыҧсадгьыл ахь рырхынҳәра аус наҳагӡароуп. Амилаҭтә шәарҭадара шьақәзыргыло аекономика аҿиара ырццактәуп”. 

Аполитикатә партиа “Аҧсны” ахантәаҩы Ахра Арсҭаа иажәахә хыркәшо иазгәеиҭеит: “21 ашәышықәса агхақәеи аиҵахарақәеи ҳананжьуам! Иарбоу, акырӡа иҳадоу азҵаарақәа рыӡбаразы ҳҳәынҭқарра иахәҭоу акадртә лшарақәа зегьы амоуп!”

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа