Ажәабжьқәа

Популярное

Ахәаахәҭратә обиектқәа амашьынақәа реихаҵәирҭа аҟынтәи иқәгазароуп, аҩнеихагылақәа реиҭашьақәыргылара азҧхьагәаҭатәуп: Кан Кәарҷиа Аихамҩа Аҳабла даҭааит

119
08.11.2019 18:40
Ахәаахәҭратә обиектқәа амашьынақәа реихаҵәирҭа аҟынтәи иқәгазароуп, аҩнеихагылақәа реиҭашьақәыргылара азҧхьагәаҭатәуп: Кан Кәарҷиа Аихамҩа Аҳабла даҭааит
Аҳҭнықалақь ахада инапынҵақәа назыгӡо Кан Кәарҷиа ақалақь аҿы аинспекциақәа рымҩаҧгара иациҵеит.

Аҟәа. Абҵарамза 7. Аҧсныпрес. Дамеи Касланӡиа. Аҟәа ақалақь иахьаҵанакуа аусуратә ныҟәара аҳәаақәа ирҭагӡаны, Аҟәа Ахадара аиҳабы инапынҵақәа назыгӡо Кан Кәарҷиа Аихамҩа Аҳабла даҭааит.

Убри аан, Кан Кәарҷиа инаҵшьны иазгәеиҭеит: “Игәыгәҭажьны иҟоу ахәаахәҭратә обиектқәа амашьынақәа реихаҵәирҭа аҟынтәи иқәгазароуп. Иҟоуп зеиҭашьақәыргылара алшо, уи зтәу рацәажәара аҭахуп. Аҳабла уахьналало хар амамкәа еилыргоуп, аха сара игәасҭеит иажәыз ашьаҟақәа шыҟоу – иҟоуп игылоу, аха икаҳахьоугьы маҷӡам. Сара исыздырӡом урҭ функциақәас инарыгӡоз, аха иахьазы хымҧада иқәгатәны иҟоуп”.

Аҳабла ауааҧсыра аҩнеихагылақәа реиҭашьақәыргыларазы аҳҭнықалақь инапынҵақәа назыгӡо иахь аҳәара ҟарҵеит – ҩынқәак рҭыӡқәа шьеит, убри иахҟьаны ақәыршҩы анауа аҩныҵҟа аӡы бжьалоит.



Убри аан, Кан Кәарҷиа иазгәеиҭеит: “Ииашоуп, ас еиҧш апроблема ыҟоуп. Аха рыцҳарас иҟалаз зегьы иаразнак арҽеира залшаӡом, уи азыҧшра аҭахуп. Ҳара иахәҭоу адокументациа зегьы еиқәыршәаны, ахарџьынҵа ҟаҵаны, иааиуа ашықәс алагамҭазы иарбоу азҵаара аӡбара нап аҳаркуеит”.



Иара убас, аҳабла ауааҧсыра агәам-сам аҭаҧсарҭақәа разымхара шыҟоу рҳәеит. Кан Кәарҷиа еизаз агәра диргеит иааиуа амш иахымгакәа иарбоу азҵаара шыӡбахо азы.
Убасҵәҟьа, Кан Кәарҷиа Аҟәа ақалақь иахьаҵанакуа ахәыҷтәы архәмарратә плошьадкақәа ирыдҳәалоу апроблема шыҟоу азгәеиҭеит. Урҭ зегьы ақалақь абаланс аҿы иқәгылаӡам, аӡәгьы урҭ рҭагылазаашьа дахылаҧшӡом: “Рыцҳарас иҟалаз, иарбоу аобиектқәа  ахархәарахь ирыҭоуп, аха ирыдкалаӡам, аусшәҟәы ала ишьҭыхӡам. Аобиект амаҵзура абаланс аҿы иарбамзар, уи ахылаҧшрагьы мҩаҧнагаӡом. Ус акәымкәа, аобиект зҵазкуа амаҵзура алкаазар, усҟан аҭакҧхықәра зду иахәҭоу адҵа руҭар алшоит”. Аҟәа ақалақь ахада инапынҵақәа назыгӡо иажәақәа рыла, аҩнқәа ракәша-мыкәша иҟоу адәқәа рҭагылазаашьа еиҕьзар алшон, убри аҟнытә ари ахырхарҭала аусура еиҳагьы ирҕәҕәатәуп.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа