Ажәабжьқәа

Популярное

Аиммунизациа амш аҽны ахәыҷқәа акаҭран аҿы асахьа ҭырхуеит

639
27.04.2018 14:27
Аиммунизациа амш аҽны ахәыҷқәа акаҭран аҿы асахьа ҭырхуеит
Аҟәа ақалақь аҿы, Аҧсны аиммунизациа амҩаҧгара иазку Европатәи амчыбжь аҳәаақәа ирҭагӡаны, акаҭран аҿы ахәыҷқәа рсахьаҭыхра аконкурс еиҿкаахеит.

Аҟәа. Мшаҧымза 27. Аҧсныпресс. Мадина Чгәааҧҳа. Аҧсны аиммунизациа амҩаҧгара иазку Европатәи амчыбжь аҳәаақәа ирҭагӡаны, Аҟәа ақалақь, Аҧсны адраматә театр аҿаҧхьа, аиҵбыратәи аклассқәа рҵаҩцәа злахәыз, акаҭран аҿы ахәыҷқәа рсахьаҭыхра аконкурс еиҿкаахеит.  Аҭаацәеи арҵаҩцәеи рыла  ари аконкурс ахь иаагаз ахәыҷқәа, амҩаҧгаҩцәа-аниматорцәа рыцхыраарала ирлахҿыхгоу аицлабрақәа рхы аладырхәит, амедицинеи авакцинациеи атемақәа рыла ацуфарақәа рҭак ҟарҵон, аҭалым ҟарҵон, ҧшшәы рацәала еилоу амелқәа рыла акаҭран аҿы асахьа ҭырхуан. Аконкурс  аихшьаалақәа рыла, иарбоу аусмҩаҧгатә алахәылацәа зегьы агәаларшәагатә ҳамҭақәа ранашьахеит. 

Аҳақьым-епидимиолог, Еиду Амилаҭқәа Реиҿкаара (ООН) аҟны иҟоу ахәыҷтәы фонд ахәыҷқәа ргәабзиарахьчареи рыкрыфареи рзы аспециалист Андреи Тунисов, агәабзиарахьчаразы Адунеизегьтәи ассоциациа аегида ала имҩаҧысуа аиммунизациа  амҩаҧгара иазку Европатәи амчыбжь Европатәи арегион иаҵанакуа 60 тәыла рҿы ишымҩаҧысыз азы адырра ҟаиҵеит. “Сынтәа Аҧсны иарбоу акциа амҩаҧгара иадгылеит. Аҧсны агәабзиарахьчара Аминистрреи, Аҟәа ақалақь Ахадареи, ахәыҷтәы поликлиникеи, иара убас егьырҭ араионқәа рҟынтәи ҳколлегацәеи,зегьы ҳаидгыланы, аҭаацәа иахьынӡауа, авакцианациа хра злоу усны ишыҟоу деилҳаркаауеит. Аҧсны аиммунизациа амҩаҧгара иазку Европатәи амчыбжь аҳәаақәа ирҭагӡаны, акаҭран аҿы ахәыҷқәа рсахьаҭыхра аконкурс, ахәмаррақәа, иара убас ахәыҷқәа рылшара аарҧшра иазырхоу еиуеиҧшым аусмҩаҧгатәқәа  еиҿкаахьеит”, – ҳәа иҳәеит иара. Асоциалтә политикеи, аџьеи, агәабзиарахьчареи, адемографиеи, аибашьра аветеранцәеи аинвалидцәеи русқәа рзы Апарламенттә Еилакы ахантәаҩы Алхас Џьынџьал, ари акциа аиммунизациа ахымҧадатәра шыҟоу аанарҧшуеит ҳәа иазгәеиҭеит. “Рыцҳарас иҟалаз, ауааҧсыра рҕьырак аиммунизациатә политика иадгылаӡом. Еиҳарак, уи ихароу ақыҭа кҿахақәа рҿы инхо роуп, аха иџьоуџьаша, урҭ рхыҧхьаӡараҿы иҟоуп ақалақь аҿы инхогьы. Ҳара аусмҩаҧгатә амҩаҧгара ҳадгылоит, насгьы уи иазырхоу аусура арҕәҕәара аҭахуп ҳәа иҳаҧхьаӡоит. Ҳара ауааҧсыра аспециалистцәа рабжьгарақәа рхахьы иааганы ахәыҷқәа алаҵа рыҭара азы ааҧхьара ҟаҳҵоит, уи ала урҭ ишәарҭоу ачымазара баҧсқәа ирцәыхьчахоит", – ҳәа иҳәеит Алхас Џьынџьал. 

Аҳақьым-апедиатр, Аҧсны агәабзиарахьчара Аминистрра ахәшәтәра-профилактикатә усбарҭа аспециалист хада Есма Гәниаҧҳа  инаҵшьны иазгәалҭеит: “Ҳара гәахәара дула иҳадаҳкылоит Аҧсны, мшаҧымза 23 инаркны 29 рҟынӡа имҩаҧысуа аиммунизациа амҩаҧгаразы Европатәи амчыбжь адгылара ахьанаҭаз. Ари арыцхә азы ҳара аусмҩаҧгатәқәак азҧхьагәаҳҭеит. Иарбоу аамҭа иалагӡаны ашколқәеи ахәыҷбаҳчақәеи рҿы апрофилактикатә усмҩаҧгатәқәа мҩаҧысуеит. Иазгәасҭарц сҭахуп, ауааҧсыра  аиммунизациа  аҵакы ахадара еиҳа еилыркаауа иалагеит, урҭ аҵыхәтәантәи аамҭазы иумбаргьы залшом”.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа