Ажәабжьқәа

Популярное

Агәам-сам Аҟәантәи Гал араион аҿы иҟоу агәамсам еизакырҭа ахь иргоит

37
16.04.2019 15:32
Агәам-сам Аҟәантәи Гал араион аҿы иҟоу агәамсам еизакырҭа ахь иргоит
Уи азы, Гал араион Ахадареи аҳҭнықалақь Анапхгареи рыбжьара Аиқәшаҳаҭра анапаҵыҩра мҩаҧыит.

Аҟәа. Мшаҧымза 16. Аҧсныпресс. Абзазаратә црыҵқәа рықәгара иадҳәалоу апроблема аӡбара иазкхеит Гал араион Ахадареи аҳҭнықалақь Анапхгареи рыбжьара знапаҵыҩра мҩаҧгаз Аиқәшаҳаҭра. Абри атәы аанацҳауеит Аҟәа ақалақь Ахадара апресс-маҵзура.

Аацҳамҭа аҿы аҳҭнықалақь ахада Адгәыр Ҳаразиа иарбоу азҵаара азы иҟаиҵо азгәаҭарақәа аагоуп: “Иҳаҩсыз амшқәа зегьы ирылагӡаны, ҳара ишьақәгылаз аҭагылазаашьа алҵразы аусура мҩаҧаагон. Иҟаҳҵаз аҳәара ақәҿыҭра аиуит Гал араион Ахадара аҟынтәи. Уи Гал араион азгьы ифеидоу усуп, избан акәзар, араион аҿы еизо агәамсамгьы аутилизациа мҩаҧаагалоит. Уажәазы ахарџь зегьы ҳбиуџьет аҟынтәи ауп иахьынтәиаагахо, аха атәыла Анапхгара ацхыраара аҭара ишазхио азы агәра ҳдыргеит”.

Гал араион аҿы иҟоу агәамсам еизакырҭа ақыҭа Шьашьыкәара аҿы иҟоуп. Уи 2008 шықәса раахыс аус ауеит. Араион аҿы иахәҭоу атехника аҟамзаара иахҟьаны, агәамкажьырҭа аҿы агәамсам еиқәҵахон. Уи лассы-лассы амца акуан. Знапаҵыҩра мҩаҧгаз Аиқәшаҳаҭра инақәыршәаны, Аҟәа ақалақь Ахадара иамоу атехника араион ахь анагара еиҿкаахеит. “Уаанӡа, Гал араион агәамкажьырҭа (аполигон) аҿы урыстәылатәи аҳәаахьчаҩцәа уаара ирырҭоз атехника ала, шәагаала идууцәамыз ажрақәа ҟарҵон. Аха уи азхомызт азы, агәамсам аҕьырак адәахьы иаанхон. Аиқәшаҳаҭра инақәыршәаны, ҳара ҳтехника уажәы уаҟа аус ауеит, аплошьадкақәа рыриашареи, ажра дуқәеи аӡымҩахгагақәеи ржуеит”, – ҳәа иҳәеит аҳҭнықалақь Акоммуналтә усбарҭа анапхгаҩы Дмитри Аҳәба.

Дмитри Аҳәба иҟаиҵаз адыррақәа рыла, иҳаҩсыз амчыбжь иалагӡаны, Аҟәа ақалақь акоммуналтә маҵзурақәа зегьы агәамсам, аҳҭнықалақь Ахадара иатәу  амуниципалтә унитартә наплакқәа ргаражқәа рҿы ишьҭарҵон. “Аамҭак ала ақалақь аилыргареи еизаз агәамсам ақәгареи ҳрылагеит. Аамҭакәак рышьҭахь, агәамсам ықәганы Гал араион аҿы иҟоу агәамкажьырҭаҿы ижхоит. Есҽны агәамгагақәеи, қьырала игоу аидарамҩангага машьынақәеи рыла 15-20 реис рҟынӡа мҩаҧгахоит”, – ҳәа иҳәеит Дмитри Аҳәба.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа