Ажәабжьқәа

Ҳаамҭазтәи аҧсуа поетцәа ражәеинраалақәа реизга “Аҟәатәи абааш” Москва ақалақь аӡыргара мҩаҧысит

709
23.04.2018 12:02
Ҳаамҭазтәи аҧсуа поетцәа ражәеинраалақәа реизга “Аҟәатәи абааш” Москва ақалақь аӡыргара мҩаҧысит
Аизга аиқәыршәаҩ – Аҧсны ашәҟәыҩҩцәа Реидгыла ахантәаҩы Вахтанг Абхазоу.

Аҟәа. Мшаҧымза 23. Аҧсныпресс. Ашәҟәыҩҩцәа Реидгыларақәа Жәларбжьаратәи аилазаара аҿы Ҳаамҭазтәи аҧсуа поетцәа ражәеинраалақәа реизга “Аҟәатәи абааш” Москва ақалақь аӡыргара мҩаҧысит.   Аизга, ашәҟәыҩҩцәа Реидгыларақәа Жәларбжьаратәи аилазаара афинанстә цхыраарала Москва ақалақь аҿы иҭыжьын.  КАбри азы Аҧсныпресс ахь адырра ҟаиҵеит Аҧсны ашәҟәыҩҩцәа Реидгыла ахантәаҩы Вахтанг Абхазоу.

Вахтанг Абхазоу иҟаиҵаз адыррақәа рыла, иарбоу ашәҟәы аҿы 19-ҩык авторцәа рнысмҩеи рырҿиамҭақәеи анылеит. Аизга иалалеит Гьаргь Гәыблиа, Платон Бебиа, Мушьни Микаа, Теренти Ҷаниа, Мушьни Лашәриа, Витали Амаршьан, Валери Касланӡиа, Геннади Аламиа, Рушьбеи Смыр, Владимир Занҭари, Сергеи Агындиа, Игорь Хәарцкиа, Вахтанг Абхазоу, Енвер Ажьиба, Анатоли Лагәлаа, Гәында Кәыҵиниа, Гәында Сақаниа, Заира Ҭхаиҵыҟә, Дырмит Габелиа.

Ашәҟәы аӡыргара ацеремониа рхы аладырхәит урыстәылатәи апоетцәа, апрозаикцәа, аҵарауаа, Урыстәылатәи Афедерациа иҟоу Аҧснытәи Ацҳаражәҳәарҭа, Москватәи аҧсуа диаспора, аҧснытәи астудентцәа рхаҭарнакцәа, иара убас аҧсуа поетцәа Теренти Ҷаниеи Игорь Хәарцкиеи.

Ашәҟәыҩҩцәа Реидгыларақәа Жәларбжьаратәи аилазаара зыҩноу Ростоваа Рыҩны афоие аҿы, аусмҩаҧгатә аламҭалазы иқәгылеит, П. И. Чаиковски ихьӡ зху Москватәи аҳәынҭқарратә консерваториа астудентцәа Амра Барганџьиаҧҳаи Степан Баласаниани.

Аиҧылара ааиртит ашәҟәыҩҩцәа Реидгыларақәа Жәларбжьаратәи аилазаара ахантәаҩы ихаҭыҧуаҩ  Владимир Середин. Аиҧылара аҿы иара убас иқәгылеит Аҧсны ашәҟәыҩҩцәа Реидгыла ахантәаҩы Вахтанг Абхазоу, Урыстәыла ашәҟәыҩҩцәа Реидгыла ацхантәаҩы Лариса Баранова-Гонченко, аҭҵаарадырратәии арҿиаратәи аинтеллигенциа ахаҭарнакцәа. 

Урыстәылатәи Афедерациа аҿы Аҧсны Аҳәынҭқарра Ацҳаражәҳәаҩ иабжьгаҩ Татиана Гәлиа Аҧсны акультуреи аҭоурых-культуратә ҭынха ахьчареи Рминистрра ахьӡала ашәҟәыҩҩцәа гәыҧҩык Аҳаҭыртә шәҟәқәа раналшьеит. Ахәҭакахьала, аурыс бызшәа афилологиа Академиа апрезидент Григори Осипов аҧсуа гәыҧҩык поетцәеи апрозаикцәеи Аҧсни Урыстәылеи реимабзиаратә еизыҟазаашьақәа рыҿиареи рырҕәҕәареи рзы рлагалазы, Академиа ахьӡала Аҳаҭыртә шәҟәқәа ранеишьеит.

Ажәеинраалақәа реизга “Аҟәатәи абааш” иазкны ибзиоу ахҳәаа аиуит. Аиҧылара иалахәыз зегьы Аҧсни уи аҭоурыхи, акультуреи, алитературеи, аҧсуа жәлар рҟазареи  акыр ахшыҩзышьҭра шарҭо азгәарҭеит.  

Убас, Бронтеи Бедиуров иазгәеиҭеит: “Аҧсуаа аҽеиқәырхара амҩа ианысит. Имариамыз алахьынҵа змаз жәларуп аҧсуа жәлар. Аҧсуа – доуҳала ибеиоу ,ижәытәӡоу жәларуп. Сара ари ажәлар аҩныҵҟатәи адунеи зеиҕьаҟам ала исдырит аҧсуа новеллақәа санрыҧхьа ашьҭахь, иахьа уажәраанӡагьы урҭ схы-сгәы аҿы иаанханы иҟоуп, анырра ду сырҭоит, аҧсуаа аӡәырҩи сареи аиҩызара бзиагьы ҳабжьоуп. Сара азҽлымҳара ду аҭаны саҧхьеит ари аизга. Ари шәагаала идууцәам ашәҟәы аҵакы, акыр зымҽханакуа атомқәа раасҭа еиҳауп”.

 Пиотр Калитин,аҧсуаа иуадаҩыз аамҭақәа раан аҽеиқәырхара шрылшаз атәы еилыскааит ҳәа иазгәеиҭеит: “Избан акәзар урҭ алитература, апоезиа дуӡӡа рыман. Еиҳабуи еиҵбууи абиҧарақәа иреиуоу авторцәа рырҿиамҭақәа уанрыҧхьо,еиҳагьы уи агәра угоит. Иаагозар, аҧсуаа хацәнымырха рыдгьыл анырыхьчоз, аҧснытәи аҳәсақәагьы еибашьра ицон.  Ажәеинраалақәа рҿы уи зеиҕьаҟам ала ианыҧшуеит”.

Лариса Баранова-Гонченко иара убас ажәеинраалақәа рыҩаӡара ҳаракы азгәалҭеит: “Аматериал иамоу аҵакы ду умбар залшом. Ари ашәҟәы егьырҭ ареспубликақәа рахь аларҵәара алыршахар бзиан ҳәа агәаанагара сымоуп”. 

Убри аан, аизга аҧхьажәа автор Виачеслав Бигәаа иазгәеиҭеит: “Ҳаамҭазтәи аҧсуа литература ажанрқәа, апоезиагьы уахь иналаҵаны, аҿиарамҩа иануп. Аха, аиҧшзеиҧшу аҭыжьымҭа, 1958 шықәсазы Москва ақалақь аҿы иҭыжьыз "Аҧсуа поезиа антологиа “аамышьҭахь, – 21-тәи ашәышықәса иаҵанакуа аҧсуа поезиа аҿы раҧхьаӡатәи шьаҿоуп”. Ҳара ҳџьынџьуаҩ апоет Владимир Делба аизга аҭыжьра алыршара хра злоу усны ишыҟоу азгәеиҭеит.

Аусмҩаҧгатә ахыркәшамҭаз, “ашәҟәыҩҩцәа реидгыларақәа жәларбжьаратәи реилазаараҿы аиашьаратә литературатә традициақәа реиқәырхареи реихаҳареи рҿы рлагала ду азы”, гәыҧҩык аҧсуа поетцәеи апрозаикцәеи, ашәҟәыҩҩцәа Реидгыларақәа Жәларбжьаратәи аилазаара анаҧхгара ахьӡала, уи ахантәаҩы Ивана Переверзин инапы аҵаҩны, Аҳаҭыртә шәҟәқәа ранашьахеит. 

Уи аҧхьа, аизга “Аҟәатәи абааш” Аҟәа ақалақь,И. Г. Папасқьыр ихьӡ зху Амилаҭтә библиотека аҿы аӡыргара мҩаҧган.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа