Ажәабжьқәа

Популярное

Аҳәынҭқарратә комиссиа Риҵатәи амилаҭтә реликттә парк аҿы агәаҭара мҩаҧыргеит

287
03.07.2018 12:13
Аҳәынҭқарратә комиссиа Риҵатәи амилаҭтә реликттә парк аҿы агәаҭара мҩаҧыргеит
Аҧсны аҧыза-министр Геннади Гагәылиа иҟаиҵаз адҵа инақәыршәаны, акурорттә-туристтә усхкы иадҳәалоу аобиектқәа аҧхынтәи аамҭахәҭа ишазыҟаҵоу агәаҭара азы аҳәынҭқарратә Комиссиа аҧҵоуп.

Аҟәа. Ҧхынгәы 3. Аҧсныпресс. Дырмит Басарариа. Акурортқәеи атуризми Рминистрра, аекономика Аминистрра, Иҷыдоу аҭагылазаашьақәа рзы Аминистрра, Асанитар-епидимиологиатә Станциа, аҩныҵҟатәи аусқәа Рминистрра ахаҭарнакцәа злахәу Акомиссиа, Риҵатәи амилаҭтә реликттә парк, атуристтә обиектқәа “Аҭыҧҳа лылаҕырӡқәа” ҳәа изышьҭоу аӡиа, “Аӡиа иаҵәа”, Бзыҧҭатәи аҩхаа аҿы иҟоу ашьхымӡаҭра, уҳәа ргәаҭара мҩаҧнагеит.

Ашьхымӡаҭра аҧшәма Дырмит Кәакәасқьериа иусура далацәажәеит: “Ҳара ацха ҳаҧшуеит, нас уи иалхны еиуеиҧшым ацха аалыҵқәа ҟаҳҵоит. Иара убас ацха Урыстәыла, Таиланд, Еиду Арабтәи Аемиратқәа, уҳәа атәылақәа рахь идәықәаҳҵоит”.



Ахәҭакхьала, Аҧсны асанитартә ҳақьым хада Лиудмила Скорик асанитартә нормақәа рганахьала азгәаҭарақәак ҟалҵеит: “Атауар ахаҭа ииашаны еиқәыршәоуп, аха аҭра аҿы аалыҵ ҭзыжьызи, аалыҵ злыхыуи, иара убас уи ахархәаразы иамоу аҽҳәареи рзы адырранҵа хымҧада иақәырҷабзароуп”.

Аекологиеи аҧсабара ахьчареи рзы аҳәынҭқарратә Еилакы анаҧхгаҩы Савели Ҷыҭанаа Бзыҧтәи аҩхаа иахьаҵанакуа аус зуа атуристтә обиектқәа рҭагылазаашьа далацәажәеит: “Атуристцәа аҵиаақәа ирыдҿарҳәало ацахақәа аҧсабара ааха анаҭаӡом. Арҭ аҵиаақәа иқәӡаауа ахкқәа рахь иаҵанакӡом”. 

Иагьа ус иҟазаргьы, акурортқәеи атуризми рзы аминистр ихаҭыҧуаҩ Асҭамыр Ахба иазгәеиҭеит: “Аҧсабаратә баҟақәа ацахақәа рыдҿаҳәалара азы атуристцәа азин ахьраҳҭо зынӡа ииашаны исзыҧхьаӡаӡом. Аха-уи шьҭа акыр шықәса раахыс ишьақәгылахьоу традицианы иҟоуп, убри аҟнытә  икомпромистәу аӡбара ҧшаатәуп. Иаагозар,  атуристцәа ацахақәа аӡылбааҽҽа иамариашаны инагоу ашаха аҿы мацара адҿаҳәалара азы азин рыҭазар ҟалоит. Иара убас, аӡылбааҽҽа “Аҭыҧҳа лылаҕырӡқәа” ишаадыруа еиҧш, амҩаду аҽықә аҿы иҟоуп. Уи атуристцәа рзы ашәарҭара ацуп. Убас, амашьынакқәа ахьыиасуа аҭыҧ арҭбаареи, ашьаҟамҩа аӡылбааҽҽа аганахьала аиагареи рыла ари азҵаара ӡбазар ҟалоит”.



Аӡылбааҽҽа “Аҭыҧҳа лылаҕырӡқәеи” “Аӡиа Иаҵәеи” иахьаҵанакуа, акомиссиа ала зинда ашьаҟамҩа аҿы ишьақәыргылоу ахәаахәҭратә ҿхышәқәа аарҧшхеит. Урҭ рыҟазаара ашьаҟауаа рыиасра акыр иаруадаҩуеит.

Риҵатәи амилаҭтә реликттә парк анаҧхгаҩы Рита Лолуа имҩаҧгаз асурақәа дрыхцәажәеит: “Ҳара аоперативтә пункт аҧаҳҵеит. Араҟа амедицинатә кабинет, ахьчареи амилициеи рыҟәша ыҟоуп. Уаанӡа амилициа ахатәы уадақәа амаӡамызт. Ашьаҟамҩақәа рҿаҧхьа агәамсамҭаҧсарҭақәа шьақәыргылоуп, ауаажәларратә шьышьмаҭрақәа рҿы аиҭашьақәыргыларатә усурақәа мҩаҧгоуп, амҩақәа рҽеиуп, иҿыцу ацрыӡцарҭақәеи аӡымҩангагақәеи шьҭаҵоуп, аҟәара арҕәҕәаразы аусурақәа нагӡоуп. Асезон қәҿиара имҩаҧысыр, аӡиа Риҵа аҧшаҳәа зегьы хаҳцәыла ачаҧара азҧхьагәаҭаны иҳамоуп”.



Агәаҭарақәа рылҵшәақәа рыла, Акомиссиа ахаҭарнакцәа Риҵатәи амилаҭтә реликтә парки, уи иахьаҵанакуа аус зуа  азеиҧш крыфарҭақәеи рҭагылазаашьа бзиоуп ҳәа алкаа ҟарҵеит.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа