Ажәабжьқәа

Популярное

Аҳәынҭқарра Ахада иҟны иҟоу астратегиатә ҭҵаарақәа Рцентр анапхгаҩы ҿыц Ацентр аҿы иазҧхьагәаҭаны иамоу ауснагӡатәқәа дрылацәажәеит

228
25.11.2019 17:17
Аҳәынҭқарра Ахада иҟны иҟоу астратегиатә ҭҵаарақәа Рцентр анапхгаҩы ҿыц Ацентр аҿы иазҧхьагәаҭаны иамоу ауснагӡатәқәа дрылацәажәеит
Гиви Габниа абҵарамза 13, 2019 шықәса рзы Аҳәынҭқарра Ахада иҟны иҟоу астратегиатә ҭҵаарақәа Рцентр анапхгаҩыс дҟаҵоуп.

Аҟәа. Абҵарамза 25. Аҧсныпресс. Дырмит Басариа. Аҳәынҭқарра Ахада иҟны иҟоу астратегиатә ҭҵаарақәа Рцентр аҿы апресс-конференциа мҩаҧысит. Араҟа Ацентр анапхгаҩы ҿыц Гиви Габниа Ацентр аҿы иазҧхьагәаҭаны иамоу ауснагӡатәқәа ртәы ажурналистцәа ирзеиҭеиҳәеит.

“Уажәазы сара акадрқәа реиқәыршәара снапы алакуп. Иҟоуп аусурахьгьы исыдыскылахьоу. Зынӡа аусурахь иҳадаҳкылараны ҳаҟоуп 8-ҩык аспециалистцәеи, 5-ҩык административ-техникатә персонал иаҵанакуа ауааи. Ацентр аҿы уаанӡа аус зуаз реиҳараҩык аекономика аусхкы рнапы алакын. Сара сгәаанагарала, ҳҳәынҭқарра аҿы аекономика адагьы егьырҭ аусхкқәа жәпакы рҿы апроблемақәа маҷымкәа иҟоуп, иаагозар, агәабзиарахьчара, акоммуналтә нхамҩа, адемографиа, асоциалтә еиқәыршәара, азинхьчара аганахьала, уҳәа. Убри аҟнытә, ҳара ҳаиҿкаара инарҭбаау аспециалистцәа реилазаара амазар ахәҭоуп. Жәаҳәарада, аҳәынҭқарраҿы зегьы аекономика иадҳәалоуп, аха апроблема анаукатә ҭҵаара ада аеффективра злоу анорма-зинтә ӡбамҭақәа рыдкылара залыршахарым”.

Ацентр ҧыхьатәи аусзуҩцәа астратегиатә ҭҵаарақәа рзы ихьыҧшым Ацентр аиҿкааразы ирымоу агәызҭазаарақәа дышҧарыхәаҧшуеи ҳәа ажурналистцәа ирҭаз азҵаара аҭак ҟаҵо, Гиви Габниа иазгәеиҭеит: “Хра злоу аконкуренциеи аиканреи Ацентр аусура акала иаҧырхагахап ҳәа сгәы иаанагом, уимоу, еиҳа еффективла аусуразы агәазыҳәара цәырнагоит”.

Астратегиатә ҭҵаарақәа Рцентр анапхгаҩы иажәақәа рыла, акадрқәа радыҧхьалара анхыркәшахалак ашьҭахь, Ацентр аспециалистцәа аиҿкаара азҧхьагәаҭа аиқәыршәара иалагоит. Уи, Аҧсны Аҳәынҭқарра Ахада Рауль Ҳаџьымба хәажәкырамза 3, 2015 шықәса рзы ишьақәирҕәҕәаз Аҧсны Аҳәынҭқарра 2025 шықәсанӡа асоциал-економикатә ҿиара Астратегиа иашьашәалахоит.


(АП): Гиви Габниа Аҳәынҭқарра Ахада иҟны иҟоу астратегиатә ҭҵаарақәа Рцентр анапхгаҩыс дҟаҵан абҵарамза 13, 2019 шықәса рзы.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа