Ажәабжьқәа

Популярное

Аҳәынҭқарра Ахада атәыла аҩныҵҟатәи аусқәа рминистр ҿыц идагалара мҩаҧигеит

427
17.08.2016 12:09
Аҳәынҭқарра Ахада атәыла аҩныҵҟатәи аусқәа рминистр ҿыц идагалара мҩаҧигеит
Аҳәынҭқарра Ахада Рауль Ҳаџьымба Аҧсны аҩныҵҟатәи аусқәа Рминистрра ахада ҿыц – Аслан Кәабахьиа идгалара мҩаҧигеит.

Аҟәа. Нанҳәамза 17. Аҧсныпресс. Ирена Џьопуаҧҳа. Анаҧхгаҩ ҿыц идгалара мҩаҧго, Аҳәынҭқарра Ахада Рауль Ҳаџьымба, хаҭала Аслан Кәабахьиа иарбоу ахылаҧшырҭаҿы ибзианы дшырдыруа азгәеиҭеит: “Аслан Алеқсеи-иҧа атәыла аҩныҵҟатәи аусқәа Рминистрраҿы Леонид Ӡаҧшьба еиҧшҵәҟьа ибзианы дырдыруеит. Урҭ рҩыџьагьы, имариамыз аибашьра ашьҭахьтәи ашықәсқәа рзы аусура еицалагеит”.

Аҳәынҭқарра Ахада анаҧхгаҩ ҿыц иаарала иарбоу ахылаҧшырҭа еиҳа аеффективра аанарҧшуа ишалаго азы агәыҕра шимоу ааирҧшит.

“Аангыларазы аамҭа ҳамаӡан. Атәыла аҩныҵҟатәи аусқәа Рминистрра имҩаҧысуа ахҭысқәа рыгәҭаҵәҟьа иҟоуп!” – ҳәа инаҵшьны иазгәеиҭеит Рауль Ҳаџьымба.

Убри аан, Аҳәынҭқарра Ахада Амнистрра ахықәкы хадақәа дырзааҭгылеит. Раҧхьаӡа иргыланы, – уи анаркотикатә маҭәашьарқәа рыдкылареи рыларҵәареи аҿагылара ауп. ”Ҵабыргуп, урҭ амаҭәашьарқәа здызкыло–ичмазаҩу ауаа роуп, аха анаркотикатә маҭәашьарқәа рыларҵәара мҩаҧызго ацәгьоуцәа аҿагылара ҕәҕәа рыҭатәуп”, – ҳәа инаҵшьны иазгәеиҭеит Рауль Ҳаџьымба.

Рауль Ҳаџьымба Аминистрраҿы акадртә усура ахадара ҷыдала дазааҭгылеит. Уи иажәақәа рыла, аҩныҵҟатәи аусқәа Рминистрра хаҭалатәи аилазаара аиқәыршәараан “хаҭалатәи аиҕьашьара насҭха инышьҭаҵаны, ауаа рзиндырратә лшарақәеи, урҭ хамеигӡарыла аусура разхиареи ҳасаб азура хымҧадатәиуп”.

Аҳәынҭқарра Ахада иара убас, Аҳәынҭқарратә Автоинспекциа аусура аиҕьтәра ҷыдала дазааҭгылеит: "Иҟаҵаз шмаҷымгьы, аҵыхәтәантәи аамҭазы, амҩаҿы иҟалаз амашәырқәа ирыхҟьаны, имаҷымкәа аҧсыҭбарақәа ҳаухьеит. Ари аҩыза аҭагылазаашьа хымҧада аҧсахра ахәҭоуп”, – ҳәа иҳәеит Рауль Ҳаџьымба.

Иара убас, Рауль Ҳаџьымба, аминистрра уаанӡатәи ахада Леонид Ӡаҧшьба аринахысгьы атәыла аҧеиҧш бзиазы иусура иациҵоит ҳәа азгәеиҭеит: “Леонид Иури-иҧа Ӡаҧшьба шәара шәҟынтәи хара дцаӡом. Уи илшарақәеи идыррақәеи иҧышәеи аринахысгьы ахархәара аиуеит. Аус ду ҳаҧхьаҟа ишьҭоуп. Ҳара аиҭакрақәа рацәаны имҩаҧаагароуп”.

Ахәҭакахьала, Леонид Ӡаҧшьба Аминистрра хаҭалатәи аилазаара аусуразы ҭабуп ҳәа реиҳәеит. Иара убас, уи иаамышьҭахь амаҵураҭыҧ иахагылаз идиныҳәалеит.

Атәыла аҩныҵҟатәи аусқәа рминистр ҿыц Аслан Кәабахьиа хаҭала иареи, иааизакны иарбоу ахылаҧшырҭеи иаду аҭакҧхықәра нагӡаны ишеиликаауа азгәеиҭеит. "Ҳара ҳус–ажәлар рымаҵура иазкуп!” – ҳәа иҳәеит иара.

(АП): нанҳәамза 16 рзы Аҳәынҭқарра Ахада Рауль Ҳаџьымба Аслан Алеқсеи-иҧа Кәабахьиа аҧыза-министр ихаҭыҧуаҩыс, атәыла аҩныҵҟатәи аусқәа рминистрс иҟаҵаразы Аусҧҟа инапы аҵаиҩит.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа