Ажәабжьқәа

Аҳәынҭқарра Ахада алагерь “Ахьышьҭра-2019” алахәылацәа дырҧылеит

59
09.07.2019 16:16
Аҳәынҭқарра Ахада алагерь “Ахьышьҭра-2019” алахәылацәа дырҧылеит
Ҧхынгәымза 1 азы Аҧсны иаатит, зусура 10-мыш ирылагӡахо Ҭырқәтәылеи Иорданиеи иқәынхо аҧсуа диаспора рхәыҷқәа рзы алагерь.

Аҟәа. Ҧхынгәымза 9. Аҧсныпресс. Дамеи Касланӡиа. Аҧсны Аҳәынҭқарра Ахада Рауль Ҳаџьымба ҧхынгәымза 1 азы Аҧсны иаатыз, зусура 10-мыш ирылагӡахо Ҭырқәтәылеи Иорданиеи иқәынхо аҧсуа диаспора рхәыҷқәа рзы алагерь “Ахьышьҭра-2019” алахәылацәа дырҧылеит.

Аҳәынҭқарра Ахада аиҧылара иалахәыз аҧсшәа реиҳәеит: “Шәара Аҧсны шәыҟазаара – гәахәара дууп ҳара зегьы ҳзы. Ас еиҧш ашьаҿақәа аринахысгьы лассы-лассы иҟалалароуп. Аҿар рыбжьара иҿыцу аиҩызаратәи аиашьаратәи аимадарақәа рыбжьаҵареи рырҕәҕәареи хымҧадатәны иҟоуп, ас еиҧш апроектқәа ҩаҧхьа ахалархәра аҵак ду аҵоуп. Арахь шәаареи, араҟа шәыҟазаареи ишәызцәырнагаз ацәаныррақәеи, аамҭа шышәхыжәгази ртәы аилкаара даараӡа аинтерес ҳзаҵоуп”.

Аџьынџьуаа рыҧсадгьыл ахь рырхынҳәразы аминистр Беслан Дбар убасҵәҟьа ари ахҭыс аҵак ду шамоу азгәеиҭеит: “Сгәы иаанагоит, ари апроект зхы алазырхәыз аҿар рзы уи рхьышьҭрахь ахынҳәразы раҧхьаӡатәи шьаҿақәаны иҟалап ҳәа. Урҭ 150 шықәса рышьҭахь, рабацәеи рабдуцәеи ирылымшаз, рҭоурыхтә ҧсадгьыл лабҿаба ирбаратәы аҭагылазаашьа рымоуп. Дара ихьыҧшым Аҧсны рбеит, уи акырӡа зҵазхкуа хҭысуп!”

Ахәҭакахьала, аҭырқәа делегациа анапхгаҩы Шамиль Ешба иазгәеиҭеит: Дара рыҩныҟақәа, рҭаацәа рахь иасуан, ари атәыла ргәаҵаҿы ишаанхо, гәыкала бзиа ишырбаз рзеиҭарҳәон. Зымҽхак дуу аус мҩаҧган, апроект ахшыҩзышьҭра ду аҭан. Уи аиҿкаара зхы алазырхәыз зегьы гәыкҧсык ала ҭабуп ҳәа расҳәоит”.

КАФФЕДа аделегациа анапхгаҩы Али Инаҧха апроект аиҿкааҩцәа рганахьала иҳәаз ажәа ҟәандақәа нациҵеит. “Ахәыҷқәа ацәанырра ҕәҕәа рызцәырнагеит, ргәы ирзалымхуа бзиа ирбеит аҭыҧантәи аҭоурых, афатә, аҧсабара, акультура, уҳәа Аҧсны ирбаз зегьы”.

Иорданиатәи аделегациа анапхгаҩы Маҳаммад Чычба иҳәеит: “150 шықәса ирылагӡаны ҳаиҟәыҭханы ҳаҟазаара лахьынҵас иҳаман. Иахьа Зегь зымчу Анцәа илҧхала ҳҭоурыхтә ҧсҭазаара ҳаблала абара азы алшара ҳауит”.



Убри аан, алагерь алахәылацәа Аҧсны аҩызцәа ҿыцқәа шдырҳаз, аинтерес зҵоу акыр ирацәаны ишырбаз, ажәлар рытрадициақәеи ркультуреи ҳаҭыр ду ақәырҵо ишалагаз рҳәеит. Ахәыҷқәа рҕьырак ҩаҧхьа Аҧсныҟа ахынҳәразы агәазыҳәара шрымоу азгәарҭеит.

Убас, Ердем Ҳалуашь апроект аиҿкааҩцәа аҭоурыхтә ҧсҭазаара абаразы иоуз алшара азы ҭабуп ҳәа реиҳәеит: “Ҳара еиуеиҧшым аҭыҧқәа ҳарҭааит, Аҧсны ахи-аҵыхәеи еимаҳдеит. Иаабаз иҳаҳаз атәы рзеиҭаҳҳәоит ҳҩызцәеи ҳауацәеи ҳҭахцәеи. Сгәаҿы иҟоу ацәаныррақәа зегьы сҿы исзарҳәом. Иаабо зегьы гәахәара дула иҳадаҳкылоит”.

Оикиу Аҭрышба убасҵәҟьа араҟа лыҟазаара ишылнырыз атәы еиҭалҳәеит: “Ари ҳәаа змаӡам гәырҕьароуп. Ҳара аҩызцәа ҿыцқәа ҳауит, ҳҭоурыхтә ҧсадгьыл аабеит. Уи акырӡа аанагоит ҳара ҳзы!”

Жан Берсиж Шьагәыж Аҧсныҟа дхынҳәырц, насгьы араҟа иҵарадырра аиура иациҵар шиҭаху азы адырра ҟаиҵеит.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа