Ажәабжьқәа

Ақыҭа Приморское аҿы быжь-ҩнык ҿыц иргылатәхоит.

1040
10.08.2017 17:19
Ақыҭа Приморское аҿы быжь-ҩнык ҿыц иргылатәхоит.
Ақыҭа Приморское аҿы аџьаҧҳаны ашьҭаҵарҭа аҿы иҟалаз аҧжәара иахҟьаны азарал зауз ақыҭауаа ақыҭа Ахадара ахыбра аҿаҧхьа атәыла анаҧхгара ахаҭарнакцәа рҧыларазы еизеит. 

Ақыҭа Приморское. Нанҳәамза 10. Мадина Чагәааҧҳа. Ақыҭауаа рҧыларазы арахь имҩахыҵит атәылахьчара аминистр Мираб Кьышмариа, Иҷыдоу Аҭагылазаашьақәа рзы аминистр Лев Кәыҵниа, аргыларатә еиҿкаарақәа рхаҭарнакцәа. Иара убас , аҭыҧ аҿы инеира иазыҧшуп атәыла аҧыза-министр Беслан Барцыц. 

Анхаҩцәа зыргәамҵуа азҵаара хадақәа иреиуоуп– ақыҭа аҿы ахҭыс ахьыҟалаз акәша-мыкәша иҧымжәаз арҭҟәацгақәа рҟынтәи арыцқьареи еилабгаз ахыбрақәа реиҭашьақәыргылареи ирыдҳәалоу аусура иаарласны ахацыркра. 

Ақыҭа ахада Анӡор Сақаниа иҟаиҵо адыррақәа рыла: “Арҭҟәацгақәеи аминақәеи километрк инареиҳаны иахьаҵанакуа иҧсаҟьаны икажьуп. Урҭ аҩнқәа ираахеит, ашҭақәеи ауҭрақәеи ирҭаҳаит. Зегьы ирыцку ауааҧсыра ршәарҭадара ашьақәыргылара азы аснаиперцәа русура арццакра ауп”. Иара иажәақәа рыла, иҟоуп даҽа зҵааракгьы- уи ааха зауз аҩнқәа реиҭашьақәыргылара азҵаара аӡбара ауп. Убри аан аусурақәа хацыркуп, аргыларатә бригадақәа аҧҵоуп, урҭ аҩнқәа реиҭашьақәыргылара иадҳәалоу аусурақәа рынагӡара иалагахьеит. 

Ахәҭакахьала, атәылахьчара Аминистрра апресс-маҵзура анаҧхгаҩы Роланд Џьоџьуа игәалаиршәеит: “Ахҭыс бааҧс аныҟалаз раҧхьаӡатәи амш, асааҭ 16:30 рзы, атәылахьчара Аминистрра иҟалаз азы адырра аланарҵәеит. Анаҩсгьы иҷыдоу ахҭыс ахьыҟалаз аҭыҧ аҟынтәи имҩаҧысуаз аусмҩаҧгатәқәа рзы адыррақәа аофициалтә массатә информациатә хархәагақәа рыла аларҵәара аиуон”. Уи ауаа имцырку адыррақәеи уҳәансҳәанқәеи рхархәара рҽақәдмыршәаларц аҳәара ҟаиҵеит: “Атәылахьчара Аминистрра иҟалаз ахҭыс бааҧсы ахҟьаҧҟьақәа рықәгара азы уахи-ҽни иааиҧмырҟьаӡакәа аусурақәа мҩаҧнагоит. Ҳара аҭыҧантәи ауааҧсыра ргәалақәа зеиҕьаҟам ала еилаҳкаауеит, урҭ цхыраарада аӡәгьы иаанижьуам. Атәылахьчара Аминистрра аҧжәара азы ашәарҭара змоу амаҭәарқәа рықәгаразы иахәҭоу зегьы ҟанаҵоит. Аҭагылазаашьа хаҭала ахылаҧшра аиҭоит атәылахьчара аминистр Мираб Кьышьмариа, уи иҷыдоу акомиссиа аҧиҵеит. Амаҵзурақәа зегьы рҳәоу еибыҭаны иҷыдоу аҭагылазаашьа арҽеира иазырхоу аусура нарыгӡоит”. 

Акопиталтә Ргылара Аусбарҭа анаҧхгаҩы Игорь Амқәаб аргыларатә усурақәа рхацыркра зырҵабыргуа адырра ҟаиҵеит: “Зегьы раҧхьаӡа иргыланы, ҳара ауаа ақәоура рҧырхагамхарц азы аҩнқәа ахыбрақәа рықәаҳҵароуп ашәқәеи аҧенџьырқәеи ҿаҳҵароуп ". 

Акопиталтә Ргылара Аусбарҭа анаҧхгаҩы Игорь Амқәаб иҟаиҵаз адыррақәа рыла, ақыҭа Приморское аҿы быжь-ҩнык ҿыц иргылатәхоит.

(АП): Ақыҭа Приморское иҟоу Аҧсны атәылахьчара Аминистрра иатәу абџьари аџьаҧҳани рыҵәахырҭа аҿы атҟәацра нанҳәамза 2, 2017 шықәса рзы иҟалеит. 


Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа