Ажәабжьқәа

Популярное

Аҧсны Жәлар Реизара – Апарламент аҿы атәыла аҿы ишьақәгылаз акриминагентә ҭагылазаашьа иалацәажәеит

224
27.11.2019 15:28
Аҧсны Жәлар Реизара – Апарламент аҿы атәыла аҿы ишьақәгылаз акриминагентә ҭагылазаашьа иалацәажәеит
Аҧсны Жәлар Реизара – Апарламент аҿы аҳәынҭқарра-зинтә политика азы Аилак инарҭбаау аилатәара мҩаҧысит.

Аҟәа. Абҵарамза 27. Аҧсныпрес. Ҭамара Ачба. Аҧсны Жәлар Реизара – Апарламент аҳәынҭқарра-зинтә политика азы Аилак инарҭбаау аилатәара аҿы, атәыла аҩныҵҟа ишьақәгылаз акриминагентә ҭагылазаашьа иалацәажәеит. Аилатәара ахь ааҧхьара рыҭан азинхьчаратә усбарҭақәеи ашәарҭадара Амаҵзуреи рхаҭарнакцәа.

Аилатәара аартуа, Аилак ахантәаҩы Валери Агрба Аҟәа аҧшаҳәа аҿы иҟалаз ацәгьоура атеррористтә акт аҳасабала дшахәаҧшуа инаҵшьны иазгәеиҭеит. “Ари ахҭыс  ухахьы аагара цәгьоуп. Аҵыхәтәантәи аамҭазы Апарламент ахь ,ишиашоу адепутатцәа рахь ишьақәгылаз аҭагылазаашьа агәҭынчымра ҕәҕәа зызцәырнагаз ауааҧсыра адҵаалон. Ауаа рхәыҷқәа рыманы аҧшаҳәаҿы анеиааира рзымгәаҕьуа иҟалеит”, – ҳәа иҳәеит Валери Агрба.

Аҧсны Жәлар Реизара-Апарламент аиҳабы Валери Кәарҷиа убасҵәҟьа иҟоу аҭагылазаашьазы игәаанагара иҳәеит: “Аҧсны ахи-аҵыхәеи зегьы иҟалаз гәалсра дула ирыдыркылеит. Ас ауаа рызныҟәара ҟалаӡом. Џьоукы рзы ҳара ҳзакәанқәа акагьы аанагаӡом. Ҳара аҳәынҭқарратә автоинспекциа аусзуҩцәа рзы азакәанқәа ҳарҕәҕәеит, аха уи анырра амоуит. Аӡбаҩцәа руалафахәы иацаҳҵеит – убасҵәҟьагьы акагьы аҽамҧсахӡеит. Ааигәа иҟалаз ахҭысқәа рышьҭахь, Апарламент азакәанҧҵараҿы еиуеиҧшым аиҭакрақәеи ацҵақәеи азҧхьагәазҭо еиҿкаау ацәгьоурақәа рзы азакәан апроект аднамкылаӡеит ҳәа аҽҧныҳәа ҳарҭоит. Ҳара, жәаҳәарада иарбоу азакәан ҳазыхынҳәраны ҳаҟоуп, аха зегьы ирыцку уи акәымзар ҟалап ҳәа сгәы иаанагоит. Ҳара иҳамоу азинхьчаратә усбарҭақәеи анагӡаратә мчратә структурақәеи реизыҟазаашьеи реимадареи асистема лассы-лассы аиҧырҟьара аныҧшуеит. Ацәгьоура ҟазҵаз ауаа ҭаркуеит, аха мызқәак рышьҭахь ҳара урҭ инеиааиуа амҩаду ишану ҳбоит. Ажәлар ирзеилкаауам ас еиҧш аҭагылазаашьа ҟалашьас иамоу. Ауаҩы ахара идымзар, нас дызҭактәузеи?! Ацәгьоура шыҟаиҵаз шьақәзырҕәҕәо шәыҧшаа, анаҩс дҭашәк. Ауаа зегьы реиҧш хаҭала саргьы азҵаарақәа жәпакы сызцәырҵуеит. Ас еиҧш аусқәа анаҩсгьы рцара зыҟалаӡом. Аус злоу Аҳәынҭқарра Ахадеи, мамзаргьы аминистрцәеи ракәым. Ас ицар, ҳара ҳзы зегьы реиҳа ихадоу – ҳҳәынҭқарра ҳцәыӡыр алшоит”.

Ахәҭакахьала, аҩныҵҟатәи аусқәа рминистр Гарри Аршба ацәгьоура афакт ала азинхьчаратә усбарҭақәа инарыгӡо аусмҩаҧгатәқәа рзы адырра ҟаиҵеит: “Абҵарамза 22, Аҟәа ақалақь, Леон имҩаду аҿы, х-ҩык ахацәа арратә маҭәала еилаҳәаны, асабрадақәа рҿаҵаны, араҟа игылоу аҧхынтәи акаҳауажәырҭа “Сан Ремо” аганахьала амашьынаҟынтәи автоматтә бџьар Калашников ала ахысра иалагеит. Аиҿахысра аан иҭахеит ҩыџьа ахацәа – Асҭамыр Шамбеи Алхас Аҩӡбеи. Иара убас ҧшь-ҩык ауаа ахәрақәа роуит. Ахәра ҕәҕәа лоуит, иахьазгьы даараӡа дуашәшәыроуп 1998 шықәса рзы ииз Доминика Акьыртаа. Иара убас ахәрақәа роуит 1988 шықәса рзы ииз Русҭам Шамбеи Сергеи Иванови. Урҭ ақалақь ахәышәтәырҭақәа рахь инаган. Ахҭыс аныҟала ашьҭахьҵәҟьа ихацыркыз аоперативтә- ҭҵааратә усмҩаҧгатәқәа рынагӡараан ашәҟәҭагаларатә дыргақәа рыда, ҧшшәыла ишкәакәаз автомашьына “Тойота Марк-2”, иара убас автоматтә бџьар ахәҭақәак “Депо” аҳаблаҿы абылра ишаҿыз ирыҧшааит. Иарбоу ацәгьоура иалахәыз ауаа рыҧшаара иазырхоу аусмҩаҧгатәқәа ирыцҵан. Аҩныҵҟатәи аусқәа Рминистрра ахатәы еилазаара зегьы ашьапы иқәыргылан, зегьынџьара апостқәа аркын, Аҩныҵҟатәи аусқәа рминистрра, Апрокуратура хада, Аҳәынҭқарратә шәарҭадара Амаҵзура аусзуҩцәа злахәу аоперативтә- ҭҵааратә гәыҧқәа аус руеит. Иахьазы алҵшәақәа ыҟоуп, аха аусеилыргара иаҧырхагамхарц азы урҭ рылацәажәара макьаназы иҟалаӡом”.

Иара убас, атәыла аҩныҵҟатәи аусқәа рминистр Апарламент адепутатцәа аиҳаҩсыз амчыбжь азы иҟалаз егьырҭ ацәгьоурақәа рзы адырра риҭеит – Аҟәа ақалақь аҿы иҟалаз ауаҩы иҧаареи, Гәдоуҭа ақалақь аҿы абзазаратә мзыс иахҟьаны иҟалаз ауаҩшьреи.

“Ауаҩы иҧаара инамаданы ҳара аоперативтә дыррақәа ҳауит. Иахьазы ацәгьоура аилыргара азы аусмҩаҧгатәқәа ркомплекс мҩаҧысуеит. Аха иҧааны иргаз ауаҩы иуацәа рҟынтәи иарбоу афакт азы официалла адырра (арзаҳал) алаҵара ҟамлаӡацт”, – ҳәа иҳәеит аминистр.
 
Анаҩстәи аилатәара ажурналистцәа аламырхәӡакәа имҩаҧысуан.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа