Ажәабжьқәа

Популярное

Аҧсны Урыстәылатәи Афедерациа Апрезидент иалхрақәа 19 алхырҭатә ҭыҧқәа рҿы имҩаҧгахоит

207
07.02.2018 15:09
Аҧсны Урыстәылатәи Афедерациа Апрезидент иалхрақәа 19 алхырҭатә ҭыҧқәа рҿы имҩаҧгахоит
Аҧсны Аҳәынҭқарра аҧыза-министр Беслан Барцыц Аҧсны Урыстәылатәи Афедерациа Апрезидент иалхрақәа рымҩаҧгара аиҿкаара азы аилацәажәара мҩаҧигеит.  

Аҟәа. Жәабранмза 7. Аҧсныпресс.  Атәыла  аҧыза-министр Беслан Барцыц Аҧсны иҟоу Урыстәылатәи Афедерациа аҷыдалкаатә зинмчы змоу Ацҳаражәҳәаҩ Семион Григориеви Аҧсны Алхратә Комиссиа Хада ахантәаҩы Ҭамаз Гогиеи, ақалақьқәеи араионқәеи рнаҧхгаҩцәеи алархәны  имҩаҧигаз инарҭбаау аилатәара аҿы Урыстәылатәи Афедерациа Апрезидент иалхрақәа рымҩаҧгара аиҿкаара азы аилацәажәара мҩаҧигеит.  

Ишазгәаҭаз ала, Урыстәылатәи Афедерациа Азакәан инакәыршәаны, Урыстәыла атәылауаа ахьынхо аҳәаанырцәтәи аҳәынҭқарра иахьаҵанакуа алхрақәа реиҿкаара ахахьы иагоит Урыстәылатәи Афедерациа Ацҳаражәҳәарҭа. 

Семион Григориев иҟаиҵаз адыррақәа рыла, алхратә ҭыҧхадақәа рхыҧхьаӡара 19 рҟынӡа ацҵара азы аӡбамҭа рыдыркылеит. Убри аан, Беслан Барцыц, алхырҭатә ҭыҧхадақәа рхыҧхьаӡара аизырҳара хымҧадатәиин, избан акәзар Урыстәылатәи Афедерациа атәылауаҩра змоу Аҧсны ауааҧсыра рҕьырак абжьыҭира рҽаладырхәоит, ҳәа алкаа ҟаиҵеит. 

Аҧсны иахьаҵанакуа абас ала алхратә ҭыҧқәа шьақәыргылахоит: Аҟәа–алхырҭатә ҭыҧқәа 4, Гагара араион –алхырҭатә ҭыҧқәа 4,  Гәдоуҭа араион–алхырҭатә ҭыҧқәа 4, Гәылрыҧшь араион –алхырҭатә ҭыҧқәа 2,  Очамчыра араион –алхырҭатә ҭыҧқәа 3,  Ҭҟәарчал араион –алхырҭатә ҭыҧк, Гал –алхырҭатә ҭыҧк.  
Беслан Барцыц  ақалақьқәеи араионқәеи рхадацәа Урыстәылатәи Афедерациа Ацҳаражәҳәарҭа  Урыстәыла Апрезидент иалхрақәа реиҿкаараҿы ацхыраара ҟарҵарҵ азы анапынҵақәа риҭеит. Аҧсны Аҳәынҭқарра Ахада Рауль Ҳаџьымба иҟаиҵаз адҵа инақәыршәаны, Урыстәылатәи Афедерациа Апрезидент иалхрақәа реиҿкаараҿы ацхыраара аҭара  иазырхоу аусура атәыла аҧыза-министр идҵоуп. 


Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа