Ажәабжьқәа

Популярное

Аҧсны Урыстәылатәи Афедерациа аҟнытә зыхәҧса 200 млн.мааҭ рҟынӡа инаӡо ақыҭанхамҩатә техника хәыда-ҧсада иаиуит

191
20.07.2018 15:23
Аҧсны Урыстәылатәи Афедерациа аҟнытә зыхәҧса 200 млн.мааҭ рҟынӡа инаӡо ақыҭанхамҩатә техника хәыда-ҧсада иаиуит
Иҳаҩсыз ашықәс азы Пицунда имҩаҧысыз Аҧсны Ахада Рауль Ҳаџьымбеи Урыстәылатәи Афедерациа Ахада Владимир Путини реицәажәара инақәыршәаны, Аҧсны Аҳәынҭқарра иаҭан иааизакны, 200 миллион мааҭ рыхә ақыҭанхамҩатә техника 57 цыреи 136 цыра ацраҳәага мыругеи.

Гәдоуҭа. Ҧхынгәымза 20. Аҧсныпресс. Мадина Чагәаа/Дамеи Касланӡиа. Гәдоуҭатәи амашьына-трактортә станциа аҿы Урыстәыла ақыҭанхамҩа Аминистрра хәыдаҧсада Аҧсныҟа иаанашьҭыз зыхәҧса 200 млн.мааҭ рҟынӡа инаӡо ақыҭанхамҩатә техника адкылара ацеремониа мҩаҧысит.



Атехника адкылара ацеремониа рхы аладырхәит Аҳәынҭқарра Ахада Рауль Ҳаџьымба, атәыла аҧыза-министр Геннади Гагәылиа, ақы танхамҩа аминистр Даур Ҭарба,Аҳәынҭқарра Ахада Иусбарҭа анаҧхгаҩы Беслан Барцыц, атәала араионқәа рхадацәа, адепутатцәа. Урыстәылатәи аган аҟынтәи атехника адгалара мҩаҧыргон Урыстәылатәи Афедерациа ақыҭанхамҩа аминистр актәи ихаҭыҧуаҩ Џьамбулат Хатуов, аҵиааӡареи, амеханизациеи , ахимизациеи рзы Адепартамент адиректор Пиотр Чекмарев, Урыстәыла ақыҭанхамҩа ацентр адиректор Александр Малько, уи ихаҭыҧуаҩ Хамзат Белхароев.



Рауль Ҳаџьымба инаҵшьны иазгәеиҭеит: “Иахьатәи ахҭыс Урыстәылатәи Афедерациеи ҳареи аусеицуразы иалаҳхыз амҩа иашаны ишылаҳхыз даҽазныкгьы агәра ҳнаргоит. Ари – аиқәшаҳаҭра хадеи уи арҿиара иазку егьырҭ аиқәшаҳаҭрақәеи рыла иҳабжьоу аимадара, ҳусеицура иалҵшәахеит. Ҳара Урыстәылатәи Афедерациа ахадара ҳҭахрақәа иашаны иахьеилыркаауа, ҳанхаҩы абас еиҧш иҟоу атехника имазарц азы алшарақәа ахьаҧырҵаз азы  иҭабуп ҳәа раҳҳәоит.

Иара убас, иҭабуп ҳәа расҳәоит ари аус иацхраауаз Урыстәылатәи ақыҭанхамҩа аминистрра. Агәра згоит ари аусбарҭа уаанӡатәи анапхгаҩи ҳареи ҳусеицура аҧхьаҟагьы аҿиара шаиуа.

Иахьа иҳазҳәаӡом атехника аганахь ала аиҧҟьара ҳамоуп ҳәа. Уажәшьҭарнахыс ҳмахәҿақәа еилҳәаны, ҳтәыла аизҳазыҕьаразы аусуроуп иаҭаху», – ҳәа иазгәеиҭеит Аҳәынҭқарра Ахада.



Ахәҭакахьала, Аҧсны ақыҭанхамҩа аминистр Даур Ҭарба ари азҵаара аҭоурых дазааҭгылеит: “2,5 шықәса раҧхьа ҳҳәынҭқарра Ахада Урыстәыла Анаҧхгара ахь ақыҭанхамҩатә техника аганахьала ацхыраара аиуразы аҳәара дәықәиҵеит. Пицунда имҩаҧысыз аҩ-ҳәынҭқаррак рхадацәа реиҧылара аҿы сра ақыҭанхацәа рыхьӡала Урыстәылатәи Афедерациа Апрезидент иахь ааҧхьара аҟаҵара азы алшара соуит. Ҳара ҳабжьы ақәҿыҭра аиуит.Урыстәылатәи ақыҭанхамҩатә центр иахәҭоу аусура зегьы мҩаҧнагеит. Ҳара иахьа аҭакҧхықәра ду ҳақәуп-ақыҭанхамҩа аалыҵи аусура алҵшәақәеи рыҩаӡара хымҧада еиҳахароуп”.



Урыстәылатәи Афедерациа Ақыҭанхамҩа аминистр актәи ихаҭыҧуаҩ Џьамбулат Хатуов аусмҩаҧгатә иалахәыз зегьы аҧсшәа реиҳәеит.



“Азин сышәҭозар, Урыстәылатәи Афедерациа Ахадеи Аиҳабыра Ахантәаҩи ақыҭанхамҩа аминистр Дмитри Николаи-иҧа Патрушев иҿаҧхьа иқәдыргылаз ауснагӡатәқәа рынагӡара иадҳәаланы ишәзааишьҭыз азеиӷьашьарақәа сырзааҭгылоит. Шәара ижәбартә еиҧш аҭагылазаашьа шәымоуп урыстәылатәи ақыҭанхамҩа иҭнажьуа аалыҵ. Иахьа ақыҭанхамҩа аихьӡарақәа, зегь раҧхьа иргыланы, амодернизациа иадҳәалоуп. Урҭ аихьӡарақәа ауҭраҭых аарыхреи абаҳча ааӡареи рзы адгьыл аус адулараҟны ҳаамҭа иақәшәо атехнологиа иабзоуроуп.



Иазгәаҳҭарц ҳҭахуп, аҧснытәи аалыҵ урыстәылатәи аџьармыкьаҿы акыр ахархәара шамоу. Агәра ҳгоит, Аҳәынҭқарра Ахада дызлацәажәоз аимпульс, Аҧсны Аҳәынҭқарра аарыхҩцәа рхашәалақәа рышьҭыҵра аҟнеиҧш, урыстәылатәи аџьармыкьаҿы ауҭраҭыхқәеи ашәырқәеи рыхкқәа реизырҳараҟынгьы ианыҧшуа иҟалоит”, – ҳәа иҳәеит Урыстәылатәи Афедерациа Ақыҭанхамҩа аминистр Актәи ихаҭыҧуаҩ Џьамбулат Хатуов.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа