Ажәабжьқәа

Аҧсны Ахада: иахьатәи амш – хашҭра зқәым агәаларшәареи алахьеиқәреи ирымшуп

129
21.05.2019 18:28
Аҧсны Ахада: иахьатәи амш – хашҭра зқәым агәаларшәареи алахьеиқәреи ирымшуп
Аҧсны Ахада Рауль Ҳаџьымба аҳәаанырцә иҟоу адиаспорақәа рахь ааҧхьара ҟаиҵеит.

Аҟәа. Лаҵарамза 21. Аҧсныпресс. Аҧсны Ахада Рауль Ҳаџьымба аҳәаанырцә иҟоу адиаспорақәа рахь иҟаиҵаз ааҧхьараҿы иаҳәоит:

“Ҳаҭыр зқәу ҳауаажәлар! Ҳаҭыр зқәу ҳџьынџьуаа!

Иахьатәи амш – хашҭра зқәым агәаларшәареи алахьеиқәреи ирымшуп. Зеижәтәи ашәышықәсазы аимпериа дуқәа реиҿагылара иахҟьаны иҟалаз атрагедиа ду – кавказтәи ажәларқәа рыхҵәара-хыҧсаара – ааха –ҕәҕәа анаҭеит ҳмилаҭ рыҿиара, ргенофонд.

Ари ахҭыс бааҧс ҳажәлар еиҩнашеит, рҭоурыхтә џьынџь, рдаракәац иацәнарҟьалеит, иарцәгьеит рлахьынҵа, иаҿаҟәеит рымҩақәа, нахьнатә аахыс изхықәаауаз рырхнышьнақәа еиҩҵәаны, Мрагылара ааскьатәи аҳәынҭқаррақәа рышҟа иҟьаны иқәнаҧсеит уи аӡыблара бааҧсы. Аха иара убас шакәугьы, ҳџьынџьуаа еиқәдырхеит рхылҵшьҭра, рдоуҳашьҭра, рбызшәа, рытрадициа, ркультура, рқьабз-рҵас. Урҭ рхы ладмырҟәит даҽа дунеихәаҧшратә системак аҿаҧхьа. Иахьагьы акырӡа иҩаҳаракны иркуп ҧсра зқәым ҳаҧсуара абираҟ!

Ҭырқәтәыла, Шьамтәыла, Иорданиа, Египет уҳәа егьырҭ атәылақәа жәпакы рҿгьы, ананамагареи, арыцҳареи ириааины, аҧсреи-абзареи ирыбжьагыланы, аҧсуаа еиқәдырхеит рхаҿра, инарҵауланы ирҳаит рышьаҭақәа ақалақьқәеи, ақыҭақәеи, аҳаблақәеи рҿы. Атәым цивилизациа иазымхәаҽит ҳажәлар ргәымшәара, еихсыҕьра зқәым рыҧсадгьыл ашҟа агәыбылра ду. Араҟа иит ирызҳаит, иҕьацеит, рыхьӡ адунеи иахыҵәеит шәҩыла, зықьҩыла ауаа нагақәа, афырхацәа, аҳәынҭқарратә усзуҩцәа, аибашьцәа, ар рҧызацәа, адипломатцәа, аспорт-ӡыргаҩцәа, апоетцәа, аҵарауаа.

1992-1993 шықәсқәа раан ақырҭуа мпыҵахалаҩцәа Аҧсны ианақәла, рыбжьы ҕәҕәаны идыргеит ҳашьцәа, ҳаҳәшьцәа, аҧсуааи ачеркесцәеи ҕәҕәала рҽеидыркылт. Рыҧсадгьыл ахьчаразы, ақырҭуа агрессорцәа реихац аандақәа еилаҧыххааны, арахь рҿаархеит жәпаҩык аибашьцәа еиҿамсқәа, ҳадиаспора ахаҭарнакцәа хьӡырҳәагақәа. Имаҷҩым наунагӡа зыҧсадгьыл зхы ақәызҵаз Аҧсны ахьчаҩцәагьы! Рыхьӡ кашәара ақәымзааит ҳадгьыл зшьала изырҧсаҳәаз ҳашьцәа!  

Иахьа аҿиарамҩа иану, адунеиаҿ акыр-џьара иазхаҵоу Аҧсны ахьыҧшымра аиқәырхараҿы ҳара хыхьчага бџьар хадас иҳамоуп, аринахысгьы иҳамазароуп ҳажәлар ракзаара, рызегь рабдуцәеи урҭ рабдуцәеи рхәышҭаарақәа, рхьышьҭрақәа рахь ихынҳәыртә алшарақәа раҧҵара.

Ҳара ҳуалҧшьақәа ируакыуп 19-тәи ашәышықәсазы ахҵәара, ақәӡаара иҭазыргылаз ҳажәлар мчыла ихырҵәоу, зџьынџь иахыгоу етноск раҳасабала разхаҵара, усеиҧш жәларбжьаратә статус рзыҧҵәаразын аполитикатә-дипломатиатә усура ду амҩаҧгара.

Уи аганахьала, ҿыц иаҧҵоу Аҧсадгьыл ахь ахынҳәразы Аминистрреи, Адәныҟатәи аусқәа рминистрреи егьырҭ аҳәынҭқарратә усбарҭақәеи реинырра иҵегь амҽхак ырҭбаатәуп.

Ҳауаажәлар зегь рзы иналыукааша хҭысны иҟалеит аҭоурых ду змоу Шьамтәыла Аҧсны ахьыҧшымра ахьазханаҵаз.

Акыр иаҧсоу ҳауаажәлар, хашьцәа, ҳаҳәшьцәа, ҳаиҳабацәа ҟәыҕақәа! Илҧха-игәыҧха шәыгымзааит иахьауажәыраанӡа арыцҳарақәа ҳрылганы ҳаазго Анцәа Ду! Иазҳалааит, ишәҭыкакаҷлааит абиҧарақәа ршьала иаагоу ихьыҧшым, иазхаҵоу Аҧсны Аҳәынҭқарра!”

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа