Ажәабжьқәа

Популярное

Аҧсны Аҳәынҭқарра Аҵареи аҭҵаарадырреи рминистр Адгәыр Какоба арҵаҩцәа рзанааҭтә ныҳәа рыдиныҳәалеит.

67
04.10.2018 15:15
Аҧсны Аҳәынҭқарра Аҵареи аҭҵаарадырреи рминистр Адгәыр Какоба арҵаҩцәа рзанааҭтә ныҳәа рыдиныҳәалеит.
“Шәара шәусура ауп еиҳарак аҿар рааӡара шьақәзыргыло, ҳтәыла аҧеиҧш бзиагьы, шәара шәнапаҟны ауп иахьыҟоу”, -ҳәа инаҵшьны иазгәеиҭеит Адгәыр Какоба. 

Аҟәа. Жьҭаарамза 5. Аҧсныпресс.  Адунеизегьтәи Арҵаҩы Имш аҽны, Аҧсны Аҳәынҭқарра Аҵареи аҭҵаарадырреи рминистр Адгәыр Какоба арҵаҩцәа рзанааҭтә ныҳәа рыдиныҳәалеит. 

Адныҳәалараҿы, ахәҭакахьала, иазгәаҭоуп: 

Акыр иаҧсоу арҵаҩцәа!

1994 шықәсазы жьҭаара 5 амш аҽны Адунеизегьтәи Арҵаҩы Имш ҳәа аныҳәа аҧҵан. Уи арҵаҩцәа зегьы рзанааҭтә ныҳәоуп. Ари амш аҽны арҵаҩы инаигӡо ароли, иибо аџьабааи, иара убас аҿар реиҵааӡараҿи хәы змаӡам илагалеи азгәарҭоит.

Арҵаҩра – баҩхатәра ҳаракуп. Арҵаҩцәа ирааӡо рҵаҩцәа ирымардо адыррақәа рыла ҿыц игыло ҳтәыла абиҧарақәа реизҳараҿы, рыҿиараҟны иҟарҵо алагаламҭа дуӡӡоуп. Ҳтәылаҿы арҵаҩы изанааҭ жәытә-натә аахыс апатуи аҳаҭыри зқәу занааҭс иҧхьаӡан. Ҳарҭ ҳаҧсҭазаара зегь иалган иаагоуп ҳарҵаҩцәа рахь иҳамоу абзиабареи апатуеиқәҵареи.

Ауаҩы иҧсҭазаара зегьы аҵара иҵоит, еиҳарак уажәтәи, ирласны зҽеиҭазкуа, зҽызыҧсахуа аҧсҭазаараҿы. Убри азоуп арҵаҩы иуалҧшьа даара аҵак ду замоу. Изызҳауа абиҧара рааӡара ҭакҧхықәра дууп ауаажәаларреи аҳәынҭқарреи рзы. Шәара шәусура ауп еиҳарак аҿар рааӡара шьақәзыргыло, ҳтәыла аҧеиҧш бзиагьы, шәара шәнапаҟны ауп иахьыҟоу.

25 шықәса раҧхьа Аҧсны Аџьынџьтәылатәи Еибашьраан арҵаҩцәа ркалам насҭха инышьҭаҵаны абџьар шьҭыхны рыҧсадгьыл рыхьчон. Урҭ рҟынтәи зыҧсадгьыл зхы ақәызҵаз маҷҩым. Рыхьӡқәагьы наунагӡа ажәлар ргәалашәараҿы иаанхоит. Аибашьра иалахәыз арҵаҩцәа реиҳарак иахьагьы ашколқәа рҿы аус руеит, абиҧара ҿыц реиҵааӡара иаҿуп. Урҭ инарыгӡо имариам русура даара пату ҳзақәуп.

Иахьа ахәыҷқәа аус рыдулара зыҧсҭазаара ҵакыс иаиуз – ҳарҵаҩцәа шәзы ныҳәоуп.

Имариам, аҭакҧхықәра зцу арҵаҩцәа шәус аҿы гәык-ҧсыкала ишәзеиӷьасшьар сҭахуп аихьӡарақәа, аҵаҩцәа рыбзиабареи, раҳаҭырқәҵареи.

Гәык-ҧсыкала ишәзеиҕьасшьоит агәабзиара, агәамч, анасыҧ, аихьӡара дуқәа шәнапы злаку аус аҟны! 

Шәадныҳәалаз Арҵаҩы имш!

 

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа