Ажәабжьқәа

20 икомфорту автобусқәа Аҧсны ақалақьқәеи араионқәеи ирзоужьуп

127
18.06.2019 13:10
20 икомфорту автобусқәа Аҧсны ақалақьқәеи араионқәеи ирзоужьуп
Автотранспорт Аивестициатә программа аҧаратә хархәагақәа рыла иаахәан.

Аҟәа. Рашәарамза 18. Аҧсныпресс. Лана Ҵәыџьба/Ҭамара Ачба. Аҟәа ақалақь аҿы Аҧсны асоциал-економикатә ҿиара ацхыраара азы Аивестициатә программа аҧаратә хархәагақәа рыла иаахәаз  автобусқәа ареспублика араионқәа рахь рыҭара мҩаҧысит. Зынӡа раахәара азҧхьагәаҭоуп 62 автобус. 

Аҧсны аҧыза-министр Валери Бганба иҟаиҵаз адыррақәа рыла, зынӡа иазоужьхеит 20 автобус. Урҭ рахьынтә 5 – Гагра араион иазоужьхоит, 5 – Гәдоуҭа араион, 5 – Аҟәа, 3 – Ҭкәарчал, 1 – Очамчыра, автобуск – Аҧснытәи аҳәынҭқарратә университет иаҭахоит. 

“Даҽа 13 автобус Амуниципалтә Унитартә Наплакы “Аҟәатәи автотранспорттә наплакы” азы иҳаураны иҟоуп. Иааиуа амзазы автопарк 15 ашколтә втобусқәеи 14 ақыҭатә втобусқәеи рыла ихарҭәаахоит. Ақыҭатә втобусқәа ирымоу алсралшара ҳаракуп. Ҧхынгәымзазы ҳара ҧхынҷкәынмзазы ихацыркыз ари апрограмма хҳаркәшоит. Уи анагӡара аамҭа рацәа агеит, избан акәзар автобусқәа рҿаҵара Ҭаҭаарсҭан акәын иахьымҩаҧысуаз. Автобусқәа раахәареи раагареи рзы Аивестициатә программа аҟынтәи идәықәҵан 162 миллион мааҭ”, – ҳәа иҳәеит аҧыза-министр. 



Аусмҩаҧгатә зхы алазырхәыз Аҳәынҭқарра Ахада Рауль Ҳаџьымба ари апрограмма иаҵоу аҵакы хада дахцәажәеит: “Уаанӡа иҟаз автобустә парк акырӡа иажәхьан, уи арҿыцра хымҧадатәиин. Автобусқәа ҳуааҧсыреи атуристцәеи риагаразы иаҳҭахуп. Ҳҳәынҭқарра туристтә тәылоуп. Убри аҟнытә ари аҩыза ауснагӡа даара ихәарҭахоит ҳәа агәаанагара сымоуп”. 

Ахәҭакахьала, Аҧсны атранспорт азы аҳәынҭқарратә усбарҭа анапхгаҩы  Робесҭан Габлиа, ас еиҧш иҟоу икомфоту автобусқәа раахәара,  иахәҭаны иҟеижьҭеи акыр ҵуеит ҳәа иазгәеиҭеит.  “Ас еиҧш атранспорттә хкы ауааҧсыреи атуристцәеи рзы акыр иманшәалахоит. Уаҵәтәи амш инаркны автобусқәа амаршрут ахь ицәырҵуеит”, – ҳәа иҳәеит Робесҭан Габлиа. Афон Ҿыц ахада Феликс Дауҭиа убасҵәҟьа автобустә транспорт аахәара ақалақь ауааҧсыра рзы акыр зҵазкуа хҭысны иҟалеит ҳәа иазгәеиҭеит.  “Ҳара уажәраанӡа, ақалақьтә аума, ашколтә аума, ҳхатәы автобус ҳамаӡамызт. Ақалақь ауааҧсыра рыхьӡала ҭабуп ҳәа расҳәарц сҭахуп ари аус еиҿызкааз зегьы”, – ҳәа иазгәеиҭеит Феликс Дауҭиа. 

Иажәхьоу автотранспорт иҿыцу ала аҧсахра шхымҧадатәиу атәы иалацәажәеит автобусқәа рныҟәҵаҩцәагьы. 



Убас, амашьынарныҟәцаҩ Гәырам Какоба иажәақәа рыла, уи уажәраанӡа аилазаара “Икарус” иатәу, 40 шықәса зхыҵхьоу автобус аҿы аус иуан.  “Шәара шәхаҭақәагьы еилышәкаауазар акәхап, ас еиҧш иажәу амашьыназы аҧсахга хәҭқәа рыҧшаара шаҟа иуадаҩу. Сара схаҭа Ҭҟәарчалтәиуп, ари ҳаҳҭнықалақь иацәыхароу қалақьуп. Убри аҟнытә  автобусқәа ҳара даара иаҳҭахуп”, – ҳәа иҳәеит иара.

Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа