Ажәабжьқәа

Популярное

“Ҧсра зқәум аполк” ҳәа ахьӡ змоу акциа Аҧсны араионқәа зегьы рҿы имҩаҧгахоит

187
06.09.2017 17:18
“Ҧсра зқәум аполк” ҳәа ахьӡ змоу акциа Аҧсны араионқәа зегьы рҿы имҩаҧгахоит
Аҧсны Аџьынџьтәылатәи еибашьара аҿы Аиааира агара Амш аҽны атәыла араионқәа зегьы рҿы акциа “Ҧсра зқәым аполк” мҩаҧысраны иҟоуп. 

Аҟәа. Цәыббрамза 6. Аҧсныпресс.  Дамеи Касланӡиа.  Акциа “Ҧсра зқәым аполк” амҩаҧысра азы еиҿкааз апресс-конференциа аҿы адырра ҟарҵеит уи аиҿкаҩцәа. 

Аҳәса-аинвалидцәа Рассоциациа ахантәаҩы Лариса Ҭарҧҳа иазгәалҭеит: “Сынтәа, Аҧсны Аџьынџтәылатәи еибашьра аҿы Аиааира агара Амш аҽны ҳара иарбоу акциа аҳәаақәа рырҭбаара азы аӡбамҭа ҳадаҳкылеит. Уи атәыла араионқәеи ақалақьқәеи рҿы имҩаҧгахоит. Аибашьра иалахәыз рфотосахьақәа ақалақьқәа рахь иҳашьҭхьеит, аҭыҧқәа рҿы акәзар, уи азы агәазыҳәара змоу зегьы Рыҧсадгьыл ахьчара зхы ақәызҵаз рыуацәа, рҭахцәа рфотосахьақәа наргар рылшоит. Акциа алахәхара азы азыҳәамҭақәа рыдкылара апунктқәа Ҭҟәарчали Пицундеи рҿы ақалақьқәа  Рхадарақәа рҿы иаартхоит, аҳҭнықалақь аҿы акәзар–аибашьра иалахәыз аҳәса-аинвалидцәа Рассоциациа, Гәдоуҭа ақалақь аҿы–ақалақьтә аҵарадыра аҟәша”. 

“Аилазаара “А-Мобайл” амаркетинг азы Адепартамент адиректор Марҭа Ҭыжәба адырра ҟалҵеит: “ Цәыббрамза 20 рҟынӡа алахәылацәа апунктқәа рҿы инеины афотосахьақәа ркьыҧхьра азы азыҳәамҭакәа шьҭарҵароуп. Урҭ гатәуп цәыббрамза 30 мышқәак шыбжьоу, аныҳәамш аҽны афотосахьақәа рыҭара залыршахом". 

Арратә Ахьӡ-Аҧша Амузеи анаҧхгаҩы Мзиа Беиа инаҵшьны иазгәеиҭеит: “Ҳара ҳзы даара акырӡа аанагоит зыҧсадгьыл зхы ақәызҵаз зегьы рфотосахьақәа аиааира азгәаҭара амш аҽны ҳара ҳҟынӡа инаӡартә аҟаҵара . Аибашьра адәаҿы иҭахама, уи ашьҭахь ироуз ахәрақәа ирыхҟьаны рыҧсҭазаара иалҵма, зегьы акоуп, урҭ рыхьӡқәа наунагӡа ҳгәалашәараҿы иаанхоит, аҭоурых адаҟьақәа хьтәы нбанла ианылоит. Ари акциа иҭахаз ргәалашәара иазкуп”.

Аусмҩаҧгатә аиҿкааҩцәа ишазгәарҭаз ала, акциа амҩаҧгара аамҭа азы адыррақәа ҧыҭрак аамышьҭахь иҟаҵахоит. 

(АП): Акциа аиҿкааҩцәа- 1992-1993 шш. Аҧсны Аџьынџьтәылатәи еибашьра иалахәыз аҳәса-аинвалидцәа Рассоциациа, Владислав Арӡынба ихьӡ зху Арратә Ахьӡ-Аҧша Амузеи, аилазаара “А-Мобаил”, атәыла Анаҧхгара. Акциа аиҿкааратә комитет наҧхгара аиҭоит Аҳәынҭқарра Ахада ихаҭыҧуаҩ  Витали Габниа. 


Возврат к списку


Амш зеиԥшрахо
Яндекс.Погода
Авалиута акурс
Социальные сети
Аӡырга
Аинформациатә алахәылаҩцәа